Atyraýda jastarǵa arnalǵan úshinshi bıznes-festıval ótti.
British Council (Brıtandyq Keńes) «Shevron» kompanıasymen jáne Atyraý oblystyq ákimdigimen seriktestikte júzege asyryp jatqan «I-SEED: ınovasıalar – áleýmettik kásipkerlik jáne bilim berý» jobasynyń sheńberinde Atyraý munaı jáne gaz ýnıversıtetinde jastarǵa arnalǵan jyl saıynǵy úshinshi «Samǵaý» bıznes-festıvali ótti. Alǵashqy eki festıvál 2017, 2018 jyldary ótti, olarǵa 700-ge tarta jastar qatysty.
«Samǵaý» festıvaliniń maqsaty – mektep oqýshylary men stýdentterdiń arasynda kásipkerlikti nasıhattaý jáne olardyń kásipkerlik mashyqtaryn jattyqtyryp, tartymdy ári qyzǵylyqty túrde damytýyna múmkindik berý. Festıválde qonaqtar túrli júldeli konkýrstar men utys oıyndaryna qatysyp, ústel oıyndary men bıznes-oıyndaryna qatysa alady, bıznes júrgizýdiń san alýan qyrlary týraly tabysty kásipkerlerdiń áńgimesin tyńdaýǵa da múmkinshilik bar.
Sondaı-aq festıválde Atyraýdyń jańadan bastaǵan áleýmettik kásipkerleri arasynda “Startap shaıqasy” baıqaýynyń «Kórermen kózaıymy» júldesiniń jeńimpazy jarıalandy. Jeńimpaz 29 sáýir men 10 mamyr aralyǵynda halyqtyq onlaın-daýys berý arqyly anyqtaldy. Ol Alim Design jobasymen aldyǵa shyqqan Baýyrjan Ýmralıev. Jeńimpaz atanǵan Baýyrjan “Shevron” kompanıasynan óz bıznesin odan ári damytýǵa júlde retinde 3 000 dollar aldy.
Atyraý munaı jáne gaz ýnıversıtetiniń strategıalyq damý jónindegi prorektory Erbol Temirǵalıuly Nurpeıisov atap ótkendeı, Atyraý jastarynyń jan-jaqty, sonyń ishinde áleýmettik kásipkerlik baǵytynda damyp kele jatqany qýantady.
«I-SEED Atyraý» aıasynda ótkiziletin «Samǵaý» bıznes-festıvali Atyraý munaı jáne gaz ýnıversıtetiniń qabyrǵasynda úshinshi ret ótkizilýde jáne biz bıznestegi jańa tásilderdi bilgisi keletin, tabysty kásipkerlerden tájirıbelik usynystar alýǵa, ýaqytyn qyzyqty ótkizgisi keletin júzdegen jastardy qabyldaýǵa daıynbyz» deıdi ol.
«Samǵaý» bıznes-festıvaliniń ótkizilýine negiz bolǵan «I-SEED Atyraý» jobasy – jastardyń tabysty mansap qurýy jáne belsendi azamattyq ustanymyn damytýy úshin qajetti bilimi men mashyqtaryn jetildirýde qoldaý kórsetý maqsatynda 2017 jyldan bastap iske asyp keledi. Budan buryn I-SEED Almaty jáne Astana qalalarynda 2013 jyldan bastap bes jyl boıy sátti ótti.
“Shevron” kompanıasy osy jobany júzege asyra turyp Atyraý qalasynyń 1600-den astam oqýshylary men stýdentterin kásipkerlikke oqytyp, qala jastarynyń damýyna qoldaýyn bildiredi. Jastar sondaı-aq Hakaton, Startap-battl, netvorkıng jáne festıválder sıaqty joba aıasynda ótkiziletin is-sharalarǵa qatysady. “Samǵaý” bıznes-festıvali jastarǵa óz oılaryn ortaǵa salyp, basqa da bıznes-ıdeıalarmen tanysýǵa múmkindik beredi. Olar bıznes-oıyndar men kvesterge qatysyp, tabysty mansap qurýdy úırenip, bolashaqta óz isin júrgizý úshin iskerlik jáne ómirlik daǵdylaryn damytady. Sondaı-aq olar jaı ǵana dostarymen, ata-analarymen bos ýaqytaryn jaqsy, sapaly jáne paıdaly ótkize alady” – deıdi “Shevron”kompanıasynyń ókili Anar Nurbaeva.
