Qazaqstan prezıdenti Qasym-Jomart Toqaev ákimderge halyqpen keri baılanys ornatýǵa tapsyrma bergennen keıin, elorda ákimi Baqyt Sultanov aýdandyq deńgeıdegi basshylardyń jeke telefon nómirlerin jarıalady. Alaıda olarmen sóılesý múmkin emes, dep habarlaıdy Qamshy.kz aqparat agenttigi Sputnik caıtyna silteme jasap.

Ol týraly Qazaqstan telearnasynyń jańalyqtar bóliminde aıtylǵan. 

Prezıdenttiń tapsyrmasynan soń eki aı ótkende, telearna tilshisi Nur-Sultan ákimi bergen telefon nómirlerine qońyraý shalyp kóripti. Biraq keıbir basshylar telefondaryn kótermegen.

"Qazir ákimdermen baılanysý qıyn. Mysaly, Esil aýdanynyń ákimi Qaırat Zakarıanovtyń telefony kúni boıy óshirýli. Almaty aýdanynyń ákimi Ádilbek Sársembaev telefon tutqasyn kótermedi. Whats App jelisine tańerteń jazǵan jazbamyzǵa da keshke deıin jaýap bermedi", - deıdi tilshi.

Al Baıqońyr aýdanynyń ákimi Asqar Esilov orys tilinde qysqa jaýap beripti. Qaıta habarlasam degen ákim sol kúıi habarsyz ketken. Ákimderdiń ishinde tek Saryarqa aýdanynyń ákimimen baılanysýdyń sáti túsken kórinedi.

Usynǵan: Marjan Sábet