Elbasymyzdyń «100 naqty qadam» Ult Josparynyń alǵashqy 15 qadamy Kásibı memlekettik apparat qurýǵa, ıaǵnı memlekettik qyzmet salasyn jandandyrýǵa baǵyttalǵan bolatyn.

Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń Atyraý oblysy boıynsha departamentiniń uıymdastyrýymen, H.Dosmuhamedov atyndaǵy Atyraý memlekettik ýnıversıtetinde  «Memlekettik qyzmet – abyroıly mindet» taqyrybynda oblysymyzdaǵy tabysty jas memlekettik ákimshilik qyzmetshiler men  stýdentterdiń kezdesýi ótti. Búgingi stýdent – erteńgi maman demekshi, bolashaqta osy salaǵa qyzyǵýshylyq tanytyp júrgen jastarǵa memlekettik qyzmettiń mańyzy men búgingi tańda alatyn orny týraly aqparat berilip, memlekettik qyzmetkerlerge qandaı talaptar qoıylatyny tilge tıek boldy.

Kezdesýdiń  maqsaty – memlekettik qyzmetke qabiletti jáne talantty jastardy tartý, memlekettik qyzmetke túsý joldaryn keńinen nasıhattaý bolyp tabylady.

Atalǵan sharada Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń Atyraý oblysy boıynsha departamentiniń mamany Qaırlıeva Juldyz Qaırlyqyzy aldymen stýdentterge memlekettik ákimshilik laýazymdarǵa jáne quqyq qorǵaý qyzmetine túsý joldary boıynsha  toqtalyp ótti.

2016 jyldyń 1 qańtarynan bastap «Qazaqstan Respýblıkasynyń memlekettik qyzmeti týraly» Qazaqstan Respýblıkasynyń Zańy  qoldanysqa engizildi.

Zańnyń 26-babyna sáıkes «B» korpýsynyń memlekettik laýazymdaryna alǵash ret túsetin nemese memlekettik qyzmetti toqtatqannan keıin oǵan qaıtadan kiretin azamattar mynadaı irikteý kezeńderinen qamtıdy:

1) ýákiletti organ aıqyndaǵan tártippen testten ótý;

2) ýákiletti organnyń qorytyndysyn ala otyryp, jeke qasıetterin baǵalatý;

3) «B» korpýsynyń memlekettik ákimshilik laýazymyna ornalasýǵa arnalǵan jalpy konkýrs.

Memlekettik qyzmetke ornalasýǵa nıet bildirgen azamattar eń aldymen zańnamany bilýge arnalǵan testileýden jáne jeke qasıetin baǵalaý  testileýinen ótý qajettiligin atap ótti.

Sondaı –aq kezdesý barysynda oblysymyzda jas bolsa da bas bolyp júrgen  búgingi tańda Atyraý oblysy Jastar saıasaty máseleleri basqarmasynyń basshysy Rollan Qabyluly sóz alyp, jastarǵa memlekettik qyzmette qyzmet atqarý  jaýaptylyqty talap etetindigin aıtyp ótti. Sonymen qatar, memlekettik qyzmettegi jumysyn jetekshi maman laýazymynan bastap, merıtokratıa qaǵıdasymen bólim basshysyna deıin kóterilgen Atyraý oblysy ákimi apparatynyń baqylaý jáne qujattamalyq qamtamasyz etý bóliminiń basshysy Gúlzamıra Bıbozqyzy stýdentterge  óz oıymen bólisti.