25 mamyrda Nur-Sultan qalalyq ákimshilik soty úıiniń balkonynan "saılaýǵa boıkot" dep aıqaılaǵan Darhan Ómirbaevty "zań qyzmetkerlerine baǵynbady" dep aıyptap, eki táýlikke qamady dep jazady Qamshy.kz aqparat agenttigi Azattyq Radıosyna silteme jasap.
Nur-Sultan qalasy ákimshilik sotynyń sýdıasy Nurjan Qaıyrbek onyń ákimshilik quqyqbuzýshylyqqa birinshi ret tartylyp otyrǵanyn aıtyp, sol sebepti jazany jeńildetkenin jáne úkimniń birden oryndalatynyn jarıalady. "Sot qaýlysy birden qolyna tapsyrylyp, oǵan on kún ishinde shaǵymdanýǵa bolady" dedi sýdıa.
38 jastaǵy Darhan Ómirbaevtyń Azattyq Radıosy tilshilerine aıtýynsha, 20 mamyr kúni advokatynyń issaparda bolýyna baılanysty sotty keıinge qaldyrý týraly aryz jazǵanyna qaramastan, ony "sottan qashyp júr" dep kósheden ustap, sotqa ákelgen. Sotqa ony qoldap kelgen onnan astam azamattyq belsendi qatysqan.
Darhan Ómirbaev sotta 17 mamyr kúni kóp balaly otbasylarǵa beriletin áleýmettik kómekti ala almaǵany úshin qapalanyp, balkonǵa shyǵyp, Facebook áleýmettik jelisinde tikeleı efırde mıkrofonnan ádil saılaýdy talap etip, aıqaılaǵanyn aıtty. Bul týraly Qamshy.kz aqparat agenttigi jazǵan bolatyn.
"Sodan soń syrttaǵy balalar meniń dalaǵa shyǵýymdy surady. Syrtqa shyǵyp kórshilerden, esik aldyndaǵy adamdardan saılaý týraly pikirin suradym. Sol kezde polısıa ókilderi kelip, kıimimdi kıýge de múmkindik bermeı, qolymdy burap alyp ketti. Olar maǵan kómektesýge kelgen áıelimdi qorqytyp, oǵan elektrshoker qoldandy", - dedi ol.
Darhan Ómirbaevty polısıa qyzmetkerleri úıinen kúshtep alyp ketken vıdeo.
Biraq ony ustap alyp ketken polısıa leıtenanty Mansur Jaǵyparov sotta onyń aıtqandaryn joqqa shyǵardy. Onyń sózinshe, polısıa pýnktine eki habarlama túsip, ishimdik ishken adamnyń kishkentaı balalarǵa tıisip, balkonnan saılaý, prezıdent týraly neshe túrli aıtyp jatqanyna shaǵymdanǵan.
"Men úsh ret zań atymen aıtamyn dedim. Ol baǵynbaǵan soń kúshtep polısıa bólimshesine alyp kettik. Biraq men oǵan da, áıeline de elektroshokerdi qoldanǵanym joqpyn", - dedi polısıa qyzmetkeri Mansur Jaǵyparov sotta.
Advokat Baýyrjan Azanov Darhan Ómirbaevtyń kinásin anyqtaý úshin onyń ústinen shaǵym túsirgen tulǵalardy, polısıa ókilderi men oǵan taldaý jasaǵan narkolog dárigerlerdi sotqa shaqyrýdy surady. Sýdıa onyń aryzyn jartylaı qanaǵattandyryp, tek polısıa ókilinen ǵana jaýap aldy.
Prokýror J. Tústikbaev Darhan Ómirbaevtyń áreketiniń durys baǵalanǵanyn aıtyp, oǵan eki táýlik berýdi surady.
Advokat Azanov Ómirbaevtyń kinásiz ekendigin alǵa tartyp, oǵan qatysty ákimshilik isti toqtatýdy talap etti.
Aıta keteıik, Ómirbaevty polısıa buǵan deıin de basqa adamdarmen birge ruqsat etilmegen mıtıńke qatysty degen kúdikpen 22 naýryz ben 9 mamyrda ustap, onyń uıaly telefonyn alyp qoıǵan. Biraq keıin ony polısıa bólimshesine aparǵan soń bosatyp jibergen.
Usynǵan: Mıat Káshibaı
