Qazaqstandyq kásipqoı boksshy Danıar Eleýsinov (7-0, 3 KO) chılılik boksshy Lýıs Norambýenany (3-2-1, 0 KO) jeńdi dep habarlaıdy Qamshy.kz aqparat agenttigi.
Jartylaı orta salmaqta (66,678 kg) judyryqtasatyn qos boksshynyń arasyndaǵy jekpe-jek AQSH-tyń Okson-Hılle (Merılend shtaty) eldimekeninde 26 mamyrda ótti. 6 raýndqa josparlanǵan jekpe-jekte Danıar Eleýsinov tóreshilerdiń sheshimimen jeńdi.
Bul – Eleýsinovtyń kásiqoı bokstaǵy jetinshi jeńisi. Ol buǵan deıin ótkizgen 6 jekpe-jeginde de qarsylastarynan basym bolǵan.
Aıta keteık, chılılik boksshy Danıar Eleýsinovke jekpe-jekke bir kún qalǵanda ǵana qarsylas atandy. Oǵan deıin Eleýsinovtyń promoýterleri Danıar kásipqoı karerasyndaǵy jetinshi jekpe-jeginde meksıkalyq boksshy Mıgel Zamýdıoǵa (43-12-1, 27 KO) qarsy judyryqtasady degen aqparat bergen. Alaıda Merılenda shtatynyń atletıkalyq komısıasy meksıkalyq boksshyǵa jekpe-jekke shyǵýǵa ruqsat etpedi. Sonymen qatar buǵan deıin Danıar Eleýsinovtyń 8 maýsymda óziniń otandasy Genadıı Golovkın men kanadalyq boksshy Stıv Rolls arasynda ótetin boks keshinde meksıkalyq boksshy Fernando Karkamoǵa (23-9, 18 KO) qarsy judyryqtasatyny da aıtylǵan. Biraq Qazaqstan namysyn qorǵap júrgen qos boksshy bir boks keshinde judyryqtasa almaıtyn boldy. Sebep - Golovkın men Eleýsinovtyń promoýteriniń kelise almaýy.
Esterińizge sala keteıik, bul jekpe-jek 28 jastaǵy Eleýsinovtyń AQSH-taǵy tórtinshi kezdesýi. Sonymen qatar ol Ulybrıtanıada eki ret rıngke shyqsa, bir ret Monakoda jekpe-jek ótkizgen. 2016 jyly Rıoda ótken Olımpıada oıyndarynda altyn medal alǵan Eleýsinov 2018 jyldyń sáýirinen bastap kásipqoı boksta judyryqtasyp júr.
Qazir Danıar Eleýsinov kásipqoı boksshylardyń reıtıńin jarıalap otyratyn Boxrec.com saıtynyń tiziminde jartylaı orta salmaqtaǵy 1769 boksshynyń arasynda 169 orynda kele jatyr. Eleýsinovten bólek, dál osy salmaqta qazaqstandyq boksshylar Nursultan Jańabaev (81 oryn), Bobyrjan Momynov (118 oryn), Bahtıar Eıýbov (164 oryn) bar. Bul salmaqtyń kóshin amerıkalyq boksshy Terens Kroýford bastap tur. Sondaı-aq, úzdik ondyqtyń ishinde Mennı Pakáo (Fılıpın), Dennı Garsıa (AQSH), Kıt Týrman (AQSH), Amır Han (Ulybrıtanıa) syndy ataqty boksshylar da bar.
Daıyndaǵan: Mıat Káshibaı
