Y.Dúkenuly atyndaǵy Taraz qalalyq mádenıet úıinde 7 mamyr — Otan qorǵaýshylar kúnine arnalǵan merekelik is-shara ótip, onda oblys ákiminiń birinshi orynbasary Bekbolat Orynbekov QR Qarýly kúshter sarbazdary men ardagerlerine qurmet kórsetti.
Saltanatty sátte Bekbolat Orynbekov elimizdiń tynyshtyǵyn kúzetip, batyr babalardan qalǵan erlik atty murany tóbemizge tý etken barlyq mereke ıelerine izgi tilegin jetkizdi.
– Bul – elimizdiń qorǵanys qabiletiniń kemeldegenin bildiretin aıtýly mereke. Biz bul kúni Uly Otan soǵysynyń qaharmandaryna taǵzym etip, Aýǵanstan otty joldarynan ótken jaýyngerlerdiń erligin ese alamyz. Elimizdiń tynyshtyǵyn, halqymyzdyń amandyǵyn qorǵap júrgen erlerimizdi ulyqtaımyz. Osy sátti paıdalana otyryp áskerı qyzmetshilerdi, ardagerlerdi jáne barshańyzdy Otan qorǵaýshylar kúnimen quttyqtaımyn!
Tarıhqa kóz salsaq, bizdiń halyq – jaýynger. Uly dala tósindegi uly eldiń ulandary óz atamekenderin kózdiń qarashyǵyndaı qorǵaǵan. Naızanyń ushymen, bilektiń kúshimen ulanǵaıyr jerdi jaýǵa eshqashan bermegen. Búgingi kúni babalarymyzdyń mırasqa qaldyrǵan jerinde egemen el bar. Ol – Qazaqstan. Sol qaharman eldiń ulttyq áskerı kúshi bar. El tynysh bolsa bereke men birlik ornaıdy, halyq alańsyz eńbek etip, tynysh ómir súredi, beıbit eldiń ekonomıkasy órkendeıdi. Sondyqtan da jer betindegi kez kelgen memleket óz Qarýly kúshteriniń qýatty, myqty bolǵanyn qalaıdy. Búginde Táýelsizdik kúzetinde turǵan Qazaqstannyń Qarýly kúshteriniń aıbary artyp, qýaty úlken kúshke aınaldy. Bizdiń ulttyq áskerimiz el tynyshtyǵynyń saqshysy men tutastyǵynyń kepili, Táýelsizdiktiń myǵym tiregi boldy. Ásker qataryndaǵy qyzmet jastar úshin erlik pen patrıotızmniń tamasha mektebine aınalyp otyr. Jaýjúrek jaýyngerlerimiz ben sarbazdarymyzdyń áýede, jerde, teńizde el tynyshtyǵyn kúzetýde. Áskerı boryshtaryn abyroımen atqaryp kele jatyr. Biz óz armıamyzdy maqtan tutamyz, –dedi Bekbolat Serikbekuly.
Merekelik sharada Jambyl oblystyq Qorǵanys isteri departamentiniń bastyǵy, polkovnık Erlan Jabyqbaev, №81067 áskerı bóliminiń komandıri, podpolkovnık Ramazan Kenjebaev jáne №81067 áskerı bólimi komandıriniń tárbıe jáne ıdeologıalyq jumystary jónindegi orynbasary, maıor Jaqypjan Turapovqa oblysy ákiminiń Qurmet gramotasy tabys etildi. Sondaı-aq Taraz qalasynyń ákimi Qaırat Dosaev birqatar QR Qarýly kúshteriniń qyzmetkerlerin Qurmet Gramotasy jáne Alǵys hattarymen marapattady. Olardyń qatarynda «Ońtústik» óńirlik qolbasshylyǵy áskerleriniń qolbasshysy basqarmasy, Qazaqstan Respýblıkasy ulttyq qaýipsizdik komıteti shekara qyzmeti «Ońtústik» óńirlik basqarmasy men óńirdegi áskerı bólimderdiń qyzmetkerleri bar.
Saltanatty sharada «Ońtústik» óńirlik áskerleri qolbasshysynyń birinshi orynbasary, shtab bastyǵy, polkovnık Júsipov Asan quttyqtaý sóz sóılep, bul mereke batyrlyq pen tabandylyqtyń, otansúıgishtik pen elge sheksiz qyzmet etýdiń nyshany ekendigin tilge tıek etip, keleshek urpaqqa deıin Otan qorǵaýshylardyń qaharman erlikteri umytylmaıtynyn jetkizdi. Sonymen qatar QR Qarýly kúshteri salasynda jemisti eńbek etip kele jatqan birqatar azamattarǵa tósbelgiler, maqtaý qaǵazdarmen marapattady.
Baqyt Jalǵas
