Jastar jylyna oraı Taraz qalasyndaǵy  «Taraz-Arena» sport kesheninde joǵary jáne arnaýly orta oqý oryndarynyń  stýdentteri arasynda oblystyq spartakıada ótti. Jarysqa 200-ge jýyq sportshy qatysyp, sporttyń voleıbol,ústel tenısi, qol kúresi, toǵyzqumalaq, jeńil atletıka  syndy  9 túrinen júldeler jıyntyǵyn sarapqa saldy.

Eń aldymen ýnıversıtet jastary arasynda ótken tartysty jarys  spartakıada kórkin qyzdyra tústi.  Voleıboldan uldar arasynda  Taraz ınovasıalyq-gýmanıtarlyq  ýnıversıtetiniń stýdentteri qarsylas shaq keltirmese, M.H.Dýlatı atyndaǵy Taraz memlekettik ýnıversıtetiniń jigitteri ekinshi, al Taraz memlekettik pedagogıkalyq ýnıversıtetiniń ulandary úshinshi orynǵa taban tiredi. Qyzdar arasynda TarMPÝ-dyń burymdylary qarsylastarynan oq boıy oza shapty.

Ústel tenısinde TarMÝ-dyń túlegi Aıdos Muqashev teńdessiz atansa, qyzdardyń ishinde osy oqý ordasynyń taǵy bir stýdenti Sáýle Imanalynyń aıy ońynan týdy.  Qol kúresinde TarMÝ-dyń úkilep qosqan úmiti Emıl Abbasov kúsh atasyn tanymaıtynyn tanytsa,  qyzdar arasynda da TarMÝ-dyń jasy Oksana Pısmennaıanyń shoqtyǵy bıik boldy.  Asyq atýdan Taraz memlekettik ýnıversıtetiniń órenderi Nurasyl Shegetaı, Ádil Les jáne Erzat Orynbaı júldeli úsh oryndy ózara bólisip aldy.

Jeńil atletıka synynda Taraz memlekettik ýnıversıtetiniń jastary 100, 200, 1000 jáne 2000 shaqyrym qashyqtyqta  taǵy top jardy. Toǵyzqumalaq oıynynda bolsa,  uldar men qyzdar arasynda TarMPÝ-dyń eki stýdentti Aldıar Bekbergenov pen Aıgerim Meıirhanova qola júldege qol jetkizse, qalǵan júldelerdiń barlyǵy  Taraz memlekettik ýnıversıtetiniń qorjynynda ketti.

Al  arnaýly orta oqý oryndary  arasynda kishi fýtboldan Jambyl polıtehnıkalyq joǵarǵy kolejiniń jastary júzden júırik shyqsa, voleıboldan «Astana» men «Parasat» kolejderiniń baǵy jandy.  Ústel tenısinen «Taraz-Ǵasyr»  kolejiniń bilimgeri Bekzat Qunanbaı jeńis tuǵyrynan kórinse, qyzdar arasynda Qordaı aýdanynan kelgen Salıma Iýsýpova bas júldeni qanjyǵasyna baılady.

Qol kúresinen Jambyl polıtehnıkalyq joǵarǵy kolejiniń sportshysy Barysh Reısovke eshkimniń shamasy jetpese, qyzdar synynda da osy oqý ornynyń stýdentti Arýjan Qaraman qarsylastaryn qoǵasha japyrdy.

Asyq atýdan Shý kolejiniń úmiti Alıhan Alparovtyń asyǵy alshasynan tússe, shekem tas laqtyrýda qordaılyq Fatıma Myrzaǵaeva  aldyna jan salmady.   

Jeńil atletıkada 100 metr qashyqtyqta «Astana» kópsalaly kolejiniń bilimgerleri bıikten kórinse, 200 metrde qordaılyqtar, 1000 metrde Jambyl polıtehnıkalyq joǵarǵy kolejiniń,  2000 metrde «Parasattyń» jastary jasyndaı jarqyrady.

Tartysty ótken spartakıada qorytyndysynda jalpy komandalyq esepte Jambyl polıtehnıkalyq kolejiniń stýdentteri jeke dara kósh bastasa, «Parasat» koleji ekinshi, al Qordaı aýdanynyń bilimgerleri úshinshi orynnan kórindi. Jarys sońynda barlyq jeńimpazdar dıplom jáne baǵaly syılyqtarmen marapattaldy.

Baqyt Jalǵas