Elbasy N.Nazarbaev «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» atty Joldaýynda «Baspanamen qamtý kórsetkishi sońǵy 10 jylda bir turǵynǵa shaqqanda 30 prosentke ósip, búginde 21,6 sharshy metrdi qurady. Bul kórsetkishti 2030 jyly 30 sharshy metrge deıin jetkizý kerek» dep, bul baǵyttaǵy jumystardy júıeleýdi shegelep tapsyrǵan bolatyn. Tuńǵysh prezıdent óziniń «Bes áleýmettik bastamasynda» da baspanamen qamtýǵa basa kóńil bólgeni belgili.
Osyndaı qadaý-qadaý mindetter Jambyl oblysynda laıyqty júzege asýda. Ásirese, «Nurly jer» memlekettik baǵdarlamasynyń tıgizip jatqan sharapaty mol. Sonyń jarqyn dálelindeı bolyp Taraz qalasy «Báıterek» yqshamaýdanynda 60 páterli arendalyq-kommýnaldyq turǵyn úı paıdalanýǵa berildi. Qonystoı ıeleriniń qýanyshymen bólisken oblys ákiminiń orynbasary Erkebulan Daýylbaev olarǵa páter kiltterin saltanatty jaǵdaıda tabys etti.
– Oblysta «Nurly jer» baǵdarlamasy boıynsha bıylǵy jylǵa 30 turǵyn úıdiń qurylysyna 12 mıllıard teńgeden astam qarjy qaraldy. Búginde qurylys jumystary qyzý qarqyn alyp, sonyń nátıjesinde 60 otbasynyń baspanamen qamtylý qýanyshyna ortaqtasyp otyrmyz. Budan bólek, osy jyldyń sońyna deıin 30 turǵyn úıdiń 28-i paıdalanýǵa beriledi dep kútilýde. Sonyń esebinen jurtshylyqqa 2 175 páter tapsyrylmaqshy. Óńirimizde 25 myń adam úı kezeginde tursa, onyń 14 myńnan astamy turǵyn úıge óte muqtaj azamattar. Onyń ishinde 2 641-i kópbalaly otbasy sanatynda. Búdjet tapshylyǵyna qaramastan, baspana máselesin sheshý maqsatynda oblys ákimi Asqar Myrzahmetovtiń tapsyrmasymen 360 páterli 8 jataqhananyń qurylysy jaz aıynda qolǵa alynatyn boldy. Ol jataqhanalar áleýmettik osal topqa jatatyn azamattarǵa beriledi. Jalpy, jyl aıaǵyna deıin osy tektes jańadan salynatyn jataqhanalar esebinen turǵyn úı kezegi kelgenshe azamattardy jaıly baspanamen qamtý maqsatynda jurt 612 pátermen qamtylady dep kútilýde, – dedi Erkebulan Ábilhanuly.
Mamyr merekesinde qos qýanyshqa qatar kenelgender negizinen turǵyn úı kezeginde turǵan áleýmettik osal top ókilderi. Jańa kópqabatty turǵyn úı áleýmettik jaǵynan qorǵalatyn toptardyń azamattaryna jekeshelendirý quqyǵynsyz berilgen. Olar aıma-aı jalǵa berilgen páterge tóleıtin 5-6 myń teńge tólemaqyny úlken kómek dep otyr.
Jalpy, qonysty qutqa balaǵandardyń qatarynda 17-si memlekettik jáne búdjettik uıym qyzmetkeri bolsa, 31-i áleýmettik jaǵynan qorǵalǵandar, 12-si jetim balalar.
Atalǵan turǵyn úı qurylysyn merdiger «Bınom» jaýapkershiligi shekteýli seriktestigi júrgizipti. Ondaǵy páterlerdiń 30-y 71 sharshy metrdi quraıtyn 3 bólmeli bolsa, qalǵany 1,2 bólmeli páterler.
Aldaǵy ýaqytta paıdalanýǵa beriletin 1 460 páterli 21 úı kredıttik bolsa, 526 páterli 7 úı arendalyq negizde salynbaq. Onyń ishinde 187 páter kezektegi kópbalaly otbasylardyń satyp alýy úshin josparlanǵan.
Baqyt Jalǵas
