Aımaqta alǵash ret uıymdastyrylǵan chempıonatqa 10 aýdannan jáne Taraz qalasynan jasaqtalǵan 18 komandadan 300-den asa sportshy qatysyp, úzdik komandany anyqtaýda. Sondaı-aq bul sport dodasynyń óńirdiń fýtbolyn damytýǵa sep bolmaq. Sebebi, myqty aıaqdopshylar áýesqoılardyń, onyń ishinde aýyldyń qara domalaqtarynan shyǵatyndyǵy belgili. Osynaý ıgi sporttyq sharanyń ashylý saltanatyna oblys ákimi Asqar Myrzahmetov qatysyp, fýtbolshylarǵa sáttilik tiledi.

– Búgin óńirde erekshe mańyzdy kún oryn alyp otyr. Jastardy barynsha sportqa baýlý úshin, olardyń arasynan talanttardy tabý úshin sporttyq sharalar kóptep ótýi tıis. Sonyń ishinde fýtbol salasy boıynsha da arnaıy sheshim qabyldanyp, oblystyq chempıonat ótkizýdy qolǵa aldyq. Mundaǵy maqsat bireý ol – jas talanttardy anyqtap, olarǵa qoldaý kórsetý. Osylaısha, Jambyl fýtbolynyń dárejesin arttyrý, – dep atap ótken Asqar Isabekuly jarysqa qatysýshy komandalarǵa sáttilik tiledi.  

Sharaǵa arnaıy kelgen dańqty fýtbol ardageri Seıildá Baıshaqov Qazaqstan Fýtbol federasıasy atynan sportshylardy atalmysh chempıonattyń bastalýymen quttyqtap, talantty fýtbolshylar aýyldan shyǵatynyn qadap aıtty. Sondaı-aq ol óz sózinde Baızaq aýdanyn mysalǵa alyp, atalǵan aýdannan ózinen bólek Azamat Nıazymbetov, Nurken Mázbaev jáne qazirgi tańdaǵy ulttyq quramanyń negizgi oıynshysy Baýyrjan Islamhan syndy aıaq dop sheberleriniń shyqqanyn atap ótti. Sondyqtan ol óńir aýyldarynan has talanttardyń álide shyǵatynyna senim bildirdi.

Munan soń oblys ákimi Asqar Myrzahmetov pen Seıildá Baıshaqov osynaý chempıonattyń tusaýkeser oıynyn ótkizgen Sarysý jáne Talas aýdandary arasyndaǵy machtyń dobyn oıynǵa qosyp berdi. Oıyn saltanatty túrde bastalǵannan keıin kórshiles qos aýdan arasyndaǵy oıyn jankúıerlerdiń delebesin qozdyrdy. Alǵashy mınýttarda bir-biriniń osal jerlerin ańdysqan qos komandar birinshi taımnyń bel ortasynan bastap ótkir shabýyldarǵa ıek artty. Degenmen bul oıynda taktıkalyq jaǵynan talastyqtardyń qarsylas komandadan bir bas joǵary ekendigi kórinip turdy. Olar mach boıy saýatty qorǵanyp, shabýyldaryn sátti aıaqtap jatty. Esesine, sarysýlyq komandaǵa esh múmkindik bermedi. Qorytyndy esep 9:0 talastyqtardyń paıdasynda.

          Negizinen, óńirde tuńǵysh ret uıymdastyrylǵan chempıonattyń alǵashqy jarys kúninde budan ózge úsh mach ótti. Naqtyraq aıtqanda, Shý aýdanynyń aıaq dopshylary moıynqumdyq komandanyń qaqpasyna jaýapsyz 3 gol soǵyp chempıonatty sátti bastady. Al merkilikter T.Rysqulov aýdanynyń komandasyna 10 gol soǵyp, aıqyn basymdylyq tanytty. Biraq óz qaqpalaryna eshqandaı gol darytqan joq. Óz kezeginde Baızaq jáne Jýaly aýdandary arasyndaǵy mach tartysqa toly ótti. Oıyn barysynda baızaqtyqtardyń soqqan 3 golyna jýalylyqtar 2 golmen jaýap qatty.

Jalpy, chempıonat 2 kezeńnen turatyn toptyq júıe boıynsha ótkizilse, toptyq oıyndar aınalmaly júıemen órbıdi. Alǵashqy kezeńde barlyq komandalar 3 topqa bólinip ózara jasyl alańda ózara kil myqtyny anyqtamaq. Atap aıtqanda, 1topta  Shý, Qordaı, Moıynqum, Merki, Turar Rysqulov aýdandary baq synaıtyn bolady. Sonymen qatar 2 topta Talas, Sarysý, Jambyl, Baızaq, Jýaly aýdandary jasyl alańda oıyn órnegin kórsetpek. Al 3 topta Taraz qalasynyń 8 komandasy toptan shyǵý úshin arlaryn ortaǵa salmaq. Osylaısha, chempıonattyń 2 kezeńinde 1,2 top jeńimpazdary jáne 3 toptan 2 komanda aınalmaly júıemen oblys jeńimpazdary men júldegerlerin anyqtaıdy. Aıta keterligi, mamyr aıynda bastalǵan bul chempıonat qazan aıynda qorytyndylanatyn bolady.

Baqyt Jalǵas