Búginde Jambyl oblysynyń ákimdigi buqarany baspanamen qamtýǵa basa nazar aýdarýda. Bul Elbasy N.Nazarbaevtyń jyl saıynǵy dástúrli Joldaýlary men «Bes áleýmettik bastamasynda» aıqyndalǵan mańyzdy mindetter. Sondyqtan da jumyr jospar túzilip, júıeli jumystar júrgizilýde. Otan qorǵaýshy kúni merekesine oraı uıymdastyrylǵan qonystoı osy sózimizdi nyqtaı túskendeı.

Dál osy kúni Taraz qalasyndaǵy «Báıterek» yqsham  aýdanyndaǵy 100 páterli №26 arendalyq-kommýnaldyq kópqabatty turǵyn úı paıdalanýǵa berildi. Turǵyndardyń qýanyshymen ortaqtasýǵa Jambyl oblysynyń ákimi Asqar Myrzahmetov arnaıy keldi.

Sý jańa páterlerdiń  kilti Uly Otan soǵysynyń ardagerleri, ata-ananyń qaraýynsyz qalǵan balalar, áleýmettik az qamtylǵandar, memlekettik jáne búdjettik uıym qyzmetkerlerine tabystaldy. Olardyń ishinde barlyǵy 35 kópbalaly   otbasy           baspanaly boldy.

– Oblys kóleminde árbir mereke qarsańynda jańa nysandardy paıdalanýǵa berý, halyqqa páter kiltin tabystaý sıaqty ıgi sharalar dástúrge aınaldy. 8-naýryz merekesine Jańatas qalasynda 60 otbasyna páter kilti tapsyrylsa, 1-mamyrda Taraz jáne Qarataý qalalarynda barlyǵy 120 páter tapsyryldy. Onyń ishinde, 57 páter kópbalaly otbasyna berildi. Búgin osy ıgi úrdis jalǵasyn taýyp, taǵy 80 páter berilip otyr. Onyń ishinde 35 páter kópbalaly otbasyna bólinip otyr,- dedi Asqar Isabekuly óz sózinde.

Aıta ketsek, qurylysyn «Agrospesstroı» jaýapkershiligi shekteýli seriktestigi júrgizgen jaldamaly kóp páterli turǵyn úı áleýmettik jaǵynan qorǵalǵan toptardyń azamattaryna jekeshelendirý quqyǵynsyz berilip otyr. Taǵy bir eskere ketetin jaıt, «Báıterek» yqsham aýdanynda ornalasqan bul №26 úıdegi 20 páter aqpan aıynda «Myńbulaq» aýdanyndaǵy №62 úıde jarylys kezinde zardap shekkenderge ýaqytsha qonystanýǵa berilgen bolatyn. Al mereke qarsańynda ondaǵy 80 páterdiń kilti turǵyn úı alý kezegine tirkelgen azamattarǵa tabystaldy.

Jalpy, oblys boıynsha páter alý úshin kezekte 24 533 adam tursa, onyń 14 046-y halyqtyń osal tobyna jatatyndar eken. Bul qatarda 2 346  kóp balaly otbasy bar. Aǵymdaǵy jyly «Nurly jer» baǵdarlamasy aıasynda 12,1 mıllıard teńgege 2 118 kóppáterli 30 turǵyn úıdiń qurylysy júrgizilip, 1 988 páterli 28 úı paıdalanýǵa beriledi dep josparlanǵan. Al 130 páterli 2 arendalyq úı – 2020 jylǵa ótpeli eken.

Sondaı-aq Elbasy Nursultan Ábishuly Nazarbaevtyń «Nur Otan» partıasynyń HVİİİ sezinde bergen tapsyrmasy aıasynda bólingen qarjy esebinen 187 otbasyna baspana alyp berý josparlanypty. Jalpy, bıyl búdjet esebinen 2 175 otbasyn pátermen qamtý kútilýde. Sonymen qatar, turǵyn úı kezegi jetkenshe kópbalaly otbasylaryn jataqhanalarmen qamtý jumystary da qolǵa alynǵan. Bul jumystarǵa jergilikti búdjetten 2,6 mıllıard  teńge baǵyttalyp, Taraz, Jańatas, Qarataý jáne Shý qalalarynda baspanaǵa muqtaj dep anyqtalǵan osy sanattaǵy 612 otbasyna jataqhanalar salynbaq.

Al demeýshiler esebinen jalpy quny 100 mıllıon  teńgege 33 kópbalaly otbasyna turǵyn úı berý kózdelip otyrǵan kórinedi. Dál mereke qarsańynda páter kiltin qolyna alyp, kóńili tolqyǵan turǵyndardyń qýanyshynan-aq jospardyń izgilikpen iske asyp jatqandyǵyn ańǵarýǵa bolady.

Baqyt Jalǵas