Jyl ótken saıyn jańǵyra túsken  Jambyl oblysynda aǵa býynǵa qurmet kórsetý, ardagerlerdi ardaqtaý sharalary da ıgi úrdiske aınalǵan. Ásirese, Uly Jeńis merekesinde aımaqtyń atqaminerleri maılangerlerdiń shańyraǵyna arnaıy at basyn buryp, dıdarlasýdy paryz sanaıdy.

Bıylǵy mereke aıasynda oblys ákimi Asqar Myrzahmetov Uly Jeńis merekesine oraı Uly Otan soǵysynyń ardageri, Taraz qalasynyń turǵyny Tileýqabyl Tórebekovtiń otbasyna  baryp, quttyqtady. Asqar Isabekuly ardagerdiń beıbitshilik ornatýǵa qosqan úlesi men soǵystan keıingi uzaq jyldar boıy atqarǵan jemisti eńbegin atap ótip, búgingi urpaq atynan alǵysyn jetkizdi.

Tileýqabyl Tórebekov 1925 jyly Jambyl aýdany, Aısha bıbi aýylynda dúnıege kelgen. Bilimi joǵary, partıa mektebin bitirgen. 1943-1950 jyldary Keńes áskeri qatarynda qyzmet atqaryp, onyń 5 jylynda Japon soǵysyna qatysqan. Soǵystan keıingi jyldary qoǵamdyq, partıalyq jumystarǵa belsene aralasqan. 1959-1960 jyldary tamaq ónerkásip oryndary jumysshylary oblystyq kásipodaq komıtetiniń tóraǵasy bolyp istegen. Oblystyq ákimshilikte kollegıa jáne oblystyq tártiptik keńestiń múshesi bolǵan. Odan keıingi jyldary Jambyl qalalyq partıa komıtetiniń ekinshi hatshysy, oblystyq ardagerler keńesiniń tóraǵasy qyzmetterin atqarǵan. «Otan soǵysy» ordenimen jáne 17 merekelik medaldarmen marapattalǵan.

Sondaı-aq, bul kúni oblystyq máslıhattyń hatshysy Baǵlan Qarasholaqov Uly Otan soǵysynyń ardageri Áshirbek Sársenbıevtiń shańyraǵyna arnaıy baryp, Jeńistiń 74 jyldyǵymen quttyqtady.

Máslıhat hatshysy ardagerge aımaq basshysynyń alǵysyn jetkizip, oǵan baǵaly syılyqtar tabystady.

Áshirbek aqsaqal Baızaq aýdany, Qarasý aýylynda dúnıege kelgen. Soǵys bastalǵanda Ózbekstannyń Ferǵana qalasynda 3 aılyq komandırler daıyndaıtyn kýrstan ótip, 1942 jyly ásker qataryna shaqyrylǵan. Maıdanda 124-atqyshtar polki qatarynda bolyp, Ýkraınany bosatýda jáne Berlınge shabýyl jasaýda da belsendilik tanytqan. Al Jeńisti 1945 jyly Berlınde qarsy alyp, soǵystan keıin 2 jyl tazalaý armıasy qatarynda qalǵan.

Elge kelgen soń 27 jyl boıy aýyldyq keńeste hatshy bolyp qyzmet atqaryp, sol jerden qurmetti zeınetke shyǵypty.

Maıdan dalasyndaǵy erlikteri úshin Á.Sársenbıev «Erligi úshin», «Berlındi alǵany úshin», «Germanıany jeńgeni úshin» syndy orden- medaldarmen marapattalypty.

Baǵlan Jıenáliulynyń arnaıy kelip quttyqtaǵanyna rıza bolǵan ardager aq batasyn berip, elimizge ashyq aspan men beıbit zaman tiledi.

Mereke aıasynda oblys ákiminiń orynbasarlary, qala jáne aýdan basshylary da óńirdegi birqatar ardagerlerdiń úıine baryp, merekemen quttyqtady.

Aıta keteıik, búginde oblysta barlyǵy Uly Otan soǵysynyń 75 ardageri bar desek, mereke qarsanyńda olardyń árqaısysyna qalalyq jáne aýdandyq búdjetter esebinen 300 myń teńgeden syılyq retinde berildi. Al Uly Otan soǵysy qatysýshylaryna teńestirilgenderge 100 myń teńgeden, tyl eńbek ardagerlerine 50 myń teńgeden qarastyrylǵan.

Baqyt Jalǵas