Keıingi jyldary Jambyl oblysynyń áleýmettik-ekonomıkalyq damýynda oń ózgerister kóptep oryn alýda. Ásirese, Elbasynyń «Uly dalanyń jeti qyry», «Bolashaqqa baǵdar: Rýhanı jańǵyrý» maqalalary aıasynda ulttyq qundylyqtardy ulyqtaýǵa, tól tarıhymyzdy qunttaýǵa aıryqsha basymdyq berilýde. Buǵan Jambyl oblysy ákimdiginiń mádenıet, arhıvter jáne qujattama basqarmasy «Jambyl oblysynyń memlekettik arhıvi» mekemesiniń uıymdastyrýymen ótken «Erlikke taǵzym – urpaqqa paryz» atty konferensıada taǵy bir márte kóz jetkizgendeı boldyq.

Oblys ákiminiń orynbasary Sulýshash Qurmanbekovanyń tóraǵalyǵymen ótken basqosýǵa «Arhıv-2025» ǵylymı-ádistemelik ortalyǵynyń basshysy Berik Ábdiǵalı, QR Prezıdenti Arhıviniń janyndaǵy Qoǵamdyq Keńes tóraǵasy Borıs Japarov, QR Prezıdenti Arhıviniń dırektory Jámıla Ábdiqadyrova, QR Ulttyq arhıvi dırektorynyń keńesshisi Gaýhar Haırýllına jáne Túrkistan oblysynyń arhıv basshylary men mamandary, maıdangerler urpaqtary qatysty. Sondaı-aq bul sharaǵa Polsha Respýblıkasynyń, Gdansk qalasyndaǵy Pomorsk geneologıalyq qoǵamy Prezıdentiniń orynbasary, tehnıka ǵylymynyń kandıdaty, ólketanýshy Voıseh Beshınskı de arnaıy kelip, qundy málimetterimen bólisti. Jıynda aımaq basshysynyń orynbasary «Rýhanı jańǵyrý» baǵdarlamasy aıasynda ótken jyly oblys ákimi Asqar Myrzahmetovtiń bastamasymen «Erlik» memorıaldyq kesheni salynyp, onda byltyr 105 myń, bıyl qosymsha 780 Uly Otan soǵysy ardagerleriniń esimderi mármár tasqa qashalyp jazylǵanyn tilge tıek etti. Sondaı-aq  atalǵan jumystyń jalǵasy retinde «Erlik.kz» saıty iske qosylǵanyna,  mundaı ilkimdi isti júzege asyrýda arhıv qyzmetkerleriniń iskerlikterin tanytqanyna erekshe toqtaldy.

 – Elbasy Nursultan Nazarbaevtyń «Uly Dalanyń jeti qyry» atty baǵdarlamalyq maqalasynda arhıv salasyna erekshe mán berilip, Qazaqstan Respýblıkasynyń Mádenıet jáne sport mınıstrligimen «Arhıv-2025» memlekettik baǵdarlamasynyń jobasy usynyldy. Ótkenimizdi, óshkenimizdi qaıta jańǵyrtýǵa múmkindik paıda boldy. Uly Otan soǵysynyń tarıhynda áli de bolsa aqtańdaq better kóp. Sondyqtan da bul taqyrypty odan da tereń zerdeleý  jumystary júrgizilýi tıis. Búgingi konferensıa sol jumystardyń kirispesi, – dedi Sulýshash Sátbekqyzy.  

Munan soń sóz tizgindegen «Arhıv-2025» ǵylymı-ádistemelik ortalyǵynyń basshysy Berik Ábdiǵalı Uly Jeńiske qol jetkizgenimizge bıyl 74 jyl tolsa da qazirgi tańda áleýmettik jelilerde qısynǵa kelmeıtin túrli pikirlerdiń jazylyp júrgenin aıtyp, olardyń barlyǵyn tarıhtan habarsyz adamdardyń taratyp jatqanyn jetkizdi.

– Shyndyǵy kerek, qazirgi tańda kóp jerde Uly Otan soǵysy dep atalyp júr. Biz ony ekinshi dúnıejúzilik soǵys dep ataǵanymyz durys. Bul turǵyda Ýkraına memleketi Uly Jeńis dep ataý týraly arnaıy Zań da qabyldady. Jalpy, bul soǵysqa 1 mıllıon 366 myń qazaqstandyq qatysqan bolsa, onyń ishinde 130 myń qazaq batyry qaıtys boldy degen derek kúmán keltiredi. Máselen, Jambyl oblysynda júrgizilgen júıeli jumystardyń nátıjesinde 56 myń jambyldyq maıdangerdiń qaıtys bolǵany anyqtalyp otyr. Sondyqtan bul baǵyttaǵy jumystar áli zertteýdi qajet etedi, – degen Berik Baqytuly jambyldyq arhıvısterdiń jasap jatqan jumysyn ózge oblysqa tájirıbe retinde usynatyndyǵyn atap ótti.

Sondaı-aq ol jaqyn arada óziniń «Umytylǵan qaharmandar» atty kitaby jaryqqa shyǵatyndyǵyn jáne onda Keńes Odaǵynyń batyry ataǵyna usynylyp, sol ataqty ala almaı qalǵan qazaqstandyqtar týraly derekter jazylǵanyn baıan etti. Aıta keterligi, ol kitapqa maıdan dalasynda asqan erliktiń úlgisin kórsetken 9 sarbazdyń esimi enipti.

Jıynda sondaı-aq QR Prezıdenti Arhıviniń janyndaǵy Qoǵamdyq Keńes tóraǵasy Borıs Japarov aımaqta oblys ákimi Asqar Myrzahmetovtiń bastamasymen salynǵan «Erlik» memorıaldyq kesheniniń tárbıelik mańyzy zor ekendigin jetkizdi.  Konferensıa barysynda ózge de baıandamashylar ekinshi dúnıejúzilik soǵysta qazaqstandyqtardyń kórsetken erlikterin aıtyp, olar  týraly málimetterdi jınastyrýda arhıvıster eńbeginiń eren ekendigin sóz etti.

Baqyt Jalǵas