Taraz qalasy kún sanap túrlenip, sáýlettik kelbeti artyp keledi. Eki myń jyldan astam tarıhy bar kóne shahar kósheleriniń jol jabyndylaryn qalpyna keltirý de búginde ózekti máselelerdiń biri. Búginde Jambyl oblysynyń ákimi Asqar Myrzahmetovtiń tapsyrmasyna oraı bul baǵytta barlyq kóshelerdi túgendeý jumystary júrgizildi. Nátıjesinde buǵan deıin komýnaldyq menshikte uzyndyǵy 996 shaqyrym quraıtyn barlyǵy 576 kóshe tirkelse, túgendeý jumystary barysynda 1531 shaqyrymdy quraıtyn 1330 kóshe anyqtalyp otyr.

  Sondaı-aq, qaladaǵy kóshe jabyndylaryn retteý úshin arnaıy úsh jyldyq  Jol kartasy da bekitilgen bolatyn. Kartaǵa sáıkes, birinshi kezekte  mektepter, balabaqshalar, densaýlyq saqtaý nysandary sıaqty áleýmettik nysandar ornalasqan jáne qoǵamdyq kólikter qatynaıtyn, ınjenerlik júıelermen tolyǵymen qamtylǵan, kósheler jóndelý kózdelýde. Bul baǵytta bıyl aǵymdaǵy jóndeý jumystaryna búdjetten 100,0 mıllıon teńge bólinip, 22000 sharshy metrdi quraıtyn qoǵamdyq kólikpen qamtylǵan 86 kósheni qamtý josparlanǵan. Búgingi tańda onyń  8900 sharshy metrinde, ıaǵnı 36 kóshede naqty jumystar atqaryldy.  Qalǵan jumystar aǵymdaǵy jyldyń shilde aıynda aıaqtalady dep josparlanǵan.

  Sonymen qatar, qaladaǵy 29 joba boıynsha uzyndyǵy 75 shaqyrymdy quraıtyn 148 kóshege quny 1,5 mıllıard teńge bolatyn ortasha jóndeý jumystary júrgiziletin bolady.  Bul oraıda negizinen  «Taıvan», «Araı» turǵyn alqaptarynyń kósheleri qamtylmaq. Budan bólek, jergilikti búdjet esebinen 600 mıllıon teńgege qaralyp, qalanyń kópqabatty turǵyn úıleri ornalasqan shaǵyn aýdandardaǵy jol jabyndylaryna aǵymdaǵy jóndeý jumystary atqarylady.

Ol ǵana emes, qazirgi tańda shahardaǵy «Býryl A,B,V» turǵyn úı massıviniń 26 shaqyrymdy quraıtyn 50 kóshesine shaǵal tas tóseý jumystary bastaldy. Onyń jalpy quny 260 mıllıon teńgeni qurap otyr. Bul jumystardy «Aıa servıs» JSHS-gi júrgizýde. Atalǵan máseleler turaqty baqylaýǵa alynǵan.

Dýlat Aıtbaı