Búgingi tańda Jambyl oblysynyń ákimi Asqar Myrzahmetovtiń tapsyrmasymen  kóne Taraz qalasynyń sáýlettik kelbetin arttyrý máselesi qolǵa alynyp otyr. Sonymen qatar, qaladaǵy Tóle bı kóshesiniń boıynda ornalasqan «Shahrıstan» keshenin qaıta jańǵyrtý jumystaryn qolǵa alý, qalpyna keltirý jumystary da bastaý aldy. Sol sebepti óńir basshysynyń tapsyrmasymen «Shahrıstan» tarıhı-mádenı keshenin jańǵyrtýǵa joǵary deńgeıde kóńil bólindi.

Jalpy, keshen aýmaǵy 200 gektarǵa sozylyp jatyr. Bolashaqta keshen aýmaǵyna kórkemsýret galereıasy, oblystyq ólketaný murajaıy, 700-800 oryndyq amfıteatr, kólemdi saǵat stellasy, kórme zaly jáne «Rýhanıat» ortalyǵy salynady dep kútilýde. Qazirgi tańda munda tıisti jumystar atqarylýda. Jyl basynan beri Taraz qalasyn túletýdiń tyń joldary qarastyrylyp, tıisti usynystar engizilýde. Eki myń jyldan astam tarıhy bar kóne qalanyń sáýlettik kelbetin arttyrýǵa búginde tıisti mekemelerdiń bári de atsalysyp keledi. Taraz qalalyq sáýlettik búro mekemesine qala ishinen boı kóteretin nysandardyń nobaıyn syzyp, sulbasyn daıyndaý júktelipti. Búro basshysy Arman Ábdeshov qazirgi ýaqytta «Shahrıstan» etnomádenı ortalyǵynyń jobasyna erekshe mán berilip otyrǵanyn jetkizdi. Sondyqtan da atalǵan ortalyqtyń qurylysy aǵymdaǵy jyldyń kúz mezgiline deıin aıaqtalatyn bolady.

  Sonymen qatar, bolashaqta «Kóne Taraz» kesheni men «Shahrıstan» etnomádenı ortalyǵy qosylady. Sol eki nysannyń arasynan bir shaqyrymǵa sozylatyn arbat qurylysy júrgizilip, shahar kórkin arttyrýǵa erekne serpin beredi. Budan bólek, «Tekturmas» etnotarıhı kesheninde «Kóne Taraz» stansasy salynyp, aspaly jol tartylady dep josparlanýda. Aspaly jol «Tekturmas» kesheninen «Shahrıstan» ortalyǵyna deıin sozylatyn bolady. Munyń bári de kóne Taraz shaharynyń tarıhyn bilgisi kelgen týrıserge jasalǵan jaqsy jaǵdaı bolyp esepteledi. Bul oraıda Jambyl oblysy ákimdigi týrızm basqarmasynyń basshysy Qarlyǵash Aralbekova aldaǵy ýaqytta «Shahrıstan» ortalyǵynda 60 shaqty sheberhana ornalasqan qolónershiler qalashyǵy paıda bolatynyn, bul óz kezeginde qala turǵyndary men qonaqtary úshin de jaqsy bolatynyn aıtty.

  «Shahrıstan» keshenin qaıta túletýge arnalǵan jańǵyrtý sharalaryn jyl sońyna deıin aıaqtaý josparlanyp otyr. Sonymen qatar, jergilikti ákimdik Áýlıeata jerine keletin týrıserdiń qataryn bıyl 400 myńnan asyrýǵa barynsha kúsh salýda. Al, jergilikti ákimdiktiń málimetinshe, búginde joǵaryda atalǵan baǵytta 50-ge jýyq kásipkerlik nysan arnaıy tirkeýden ótip, qyzmet kórsetýge ázir eken. Sondaı-aq, jýyrda Taraz qalasyndaǵy «Tórtkúl» tarıhı kesheni mańynan biregeı «Qazaq aýyly» etnojobasy da bastaý alyp, kóptiń qyzyǵýshylyǵyn týdyrdy. Ol úshin Taraz qalasynan 12 arnaıy týrısik baǵyt ázirlenip, qonaqtarǵa yńǵaıly jaǵdaı týǵyzý maqsatynda 33 týrısik ortalyq arnaıy mobıldi qosymshaǵa egjeı-tegjeıli túsindirilip, engizilgen. Ol jerden barlyq qajetti málimetterdi QR kod arqyly da bes tilde alýǵa múmkindik bar eken. Sondaı-aq, ol qosymshada Jambyl oblysynda qyzmet etetin 178 qonaq úı men 300-den astam tamaqtaný ornynyń jáne kólik tasymalynyń syzbasy, aqsha aıyrbastaý pýnktteri men týrısik agenttikterdiń tizimi, baǵalary jasaqtalǵan.

 Dýlat Aıtbaı