Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýynda halyq turmysynyń kóterilýi, turǵyndardyń áleýmettik jaǵdaıynyń artýy úshin memleket tarapynan barlyq múmkindikterdiń jasalyp otyrǵanyn aıtqan bolatyn. Bul rette Elbasy «Bilim berýdiń, densaýlyq saqtaý salasynyń, turǵyn úıdiń sapasy men qoljetimdiligi, jaıly jáne qaýipsiz jaǵdaıda ómir súrý máseleleri árbir qazaqstandyq otbasyna qatysty», dep atap kórsetken edi. Búgingi tańda jergilikti halyqtyń turmysyn jaqsartý, áleýmettik áleýetin arttyrý Jambyl oblysynda laıyqty júzege asyrylyp keledi. Oblys ákimi Asqar Myrzahmetovtiń bastamasymen az qamtylǵan otbasylarǵa tıisti qoldaý kórsetilip otyr.

7 mamyr – Otan qorǵaýshylar kúni merekesine oraı Taraz qalasyndaǵy «Báıterek» yqshamaýdanynan 100 páterli arendalyq-kommýnaldyq kópqabatty turǵyn úı paıdalanýǵa berildi. Baspanaly bolǵandar qatarynda Uly Otan soǵysynyń ardagerleri, jetim balalar, áleýmettik az qamtylǵan otbasylar men memlekettik jáne búdjettik uıym qyzmetkerleri bar. Sonymen qatar, kópbalaly 35 otbasy da «Báıterek» yqshamaýdanynan páter ıelendi. Jambyl oblysynyń ákimi Asqar Myrzahmetov saltanatty sharaǵa arnaıy qatysyp, baspanaly bolǵan turǵyndardy quttyqtady. 

«Oblys kóleminde árbir mereke qarsańynda jańa nysandardy paıdalanýǵa berý, halyqqa páter kiltin tabystaý sıaqty ıgi sharalar dástúrge aınaldy. 8 naýryz merekesine oraı Jańatas qalasynda 60 otbasyna páter kilti tapsyrylsa, 1 mamyr merekesinde Taraz jáne Qarataý qalalarynda barlyǵy 120 páter berildi. Onyń ishinde, 57 páter ıelengen kópbalaly otbasylar da bar. Búgin osy ıgi úrdis jalǵasyn taýyp, taǵy 80 páter berilip otyr. Onyń ishinde 35 páter kópbalaly otbasyna bólinip otyr. Bárińizdi de qýanyshtaryńyzben quttyqtaımyn», dedi ákim óz sózinde.

  Paıdalanýǵa berilgen turǵyn úı memlekettik «Nurly jer» baǵdarlamasy aıasynda ótken jyly salynǵan bolatyn. Nysan qurylysyn merdiger «Agrospesstroı» jaýapkershiligi shekteýli seriktestigi júrgizgen. Atalǵan kópqabatty turǵyn úı áleýmettik jaǵynan az qorǵalǵan toptardyń azamattaryna jekeshelendirý quqyǵynsyz berilip otyr jáne arendalyq aılyq tólem kórsetkishi aıyna 5500-6000 teńge kóleminde belgilengen. Aıta keteıik, «Báıterek» yqshamaýdanynda ornalasqan bul №26 úıdegi 20 páter aǵymdaǵy jyly aqpan aıynda «Myńbulaq» aýdanyndaǵy №62 úıde jarylys kezinde zardap shekkenderge ýaqytsha qonystanýǵa berilgen bolatyn. Al, endi mundaǵy 80 páterdiń kilti turǵyn úı alý kezegine tirkelgen azamattarǵa tabystaldy. Jambyl óńirinde turǵyndardy baspanamen qamtý jumystary áli de jalǵasyn taba beretin bolady.

Dýlat Aıtbaı