Elimiz úshin eń eleýli datalardyń biri 9-mamyr Jeńis kúni.
Osyǵan oraı Aqtaýdaǵy «Máńgilik alaý» monýmenti eskertkishiniń aldynda merekelik shara ótti. Jyldaǵy dástúr boıynsha "Batyrlarǵa taǵzym" sherýi uıymdastyryldy. Qoldaryna Uly Otan soǵysyna qatysqan jaqyndarynyń sýretterin ustap shyqqan 3500 astam adam ortalyq kóshemen júrip ótti. Merekelik shara soǵys jyldarynan syr sherter teatrlandyrylǵan kórinister men án-bıge jalǵasty.
Sondaı-aq, merekege oraı qalanyń qaq ortasynda shatyr tigilip, «Áskerı dalalyq as úı» ornatylyp jurtshylyq jaýynger botqasynyń dámin tatty. Bir tilim nan, qaraqumyq botqasy qan maıdanda jaýyngerge nár berip, qaıraty men aıbatyn asyrǵan. Dál osy astan aqtaýlyqtar da aýyz tıdi.
Saltanatty jıynda oblys ákimi Eraly Toǵjanov ardagerlerdi merekemen quttyqtady. «Elbasy, Tuńǵysh prezıdentimiz Nursultan Ábishuly Nazarbaev «Qaısarlyq pen qaharmandyq, Otanǵa degen súıispenshilik asa qatygez surapyl soǵysta jeńiske jol ashty» degen bolatyn. Rasymen de, jeńis pen jetistik uǵymdary elimizdiń damý qarqynymen qashanda qanattas keledi. Sondyqtan osynaý beıbit ómirge jetkizgen ardagerlerimizdiń aldynda bas ıe otyryp, amandyq tileımin. Surapyl soǵys jyldary Qazaq halqy óziniń Otanyna, jerine degen patrıottyq sezimin dáleldedi. Mańǵystaý óńiriniń árbir tórtinshi turǵyny qolyna qarý alyp, maıdanǵa attandy. Uzyn sany 6000 myńnan astam adam Otan úshin otqa tússe, sonyń 4800-i qan maıdanda qaza bolyp, habarsyz ketti. Jeńis sarbazdary áli de sapta. Bizdiń óńirimiz boıynsha 16 Uly Otan soǵysynyń ardageri ortamyzda júr. Biz olarǵa sheksiz qurmet kórsetip, dańqyn asqaqtatýǵa tıispiz" – dedi oblys ákimi.
Sondaı-aq, oblys basshysy Taýshyq aýylynyń turǵyny, soǵys ardageri 95 jastaǵy Mámbetuly Ibrahımge Aqtaý qalasynan sý jańa páterdiń kiltin tabys etti. Mámbetuly Ibrahım 1924 jyly týǵan. Maıdanǵa 1942 jyly attanady. Qalmaq dalasy men Stalıngrad urystarǵa qatysyp jaraqat alady. Soǵys aıaqtalǵannan keıin Taýshyqta kólik júrgizýshisi bolyp uzaq jyldar qyzmet etedi. «1941-1945 jyldary UOS germanıany jeńgeni úshin» medalimen marapattalǵan.
