Mańǵystaý oblysynyń mádenıet jáne óner qyzmetkerleri kúnine oraı saltanatty shara ótti. Merekelik keshke Mańǵystaý oblysynyń ákimi Eraly Toǵjanov, sala qyzmetkerleri men ardagerleri, rýhanıat janashyrlary qatysty. Óńir basshysy jınalǵandardy merekemen quttyqtap, qajyrly eńbekteri úshin túrli marapattardy tabystady.
Atap aıtsaq, Mádenıet jáne sport mınıstrliginiń «Mádenıet salasynyń úzdigi» tósbelgisimen M.Óskinbaıuly atyndaǵy oblystyq fılarmonıasy, A.Taraquly atyndaǵy qazaq ult-aspaptar orkestriniń ártis-aspapshysy Serikqalı İzimbergenov, Q.Sydıyqov atyndaǵy oblystyq ámbebap kitaphanasynyń dırektory Záýre Aıtýarova, oblystyq qýyrshaq teatrynyń rejıseri Nadejda Nasyrova, oblystyq ǵylymı-ádistemelik jáne mádenı qyzmet kórsetý ortalyǵynyń bólim meńgerýshisi Nurjamal Noǵaeva, arheolog Andreı Astafev, Abaı atyndaǵy mádenı-demalys kesheni «Altaır» bı ansambliniń jetekshisi Tamara Dýmanovskaıa marapattaldy.
Sonymen qatar, 2018 jyldyń qorytyndysy boıynsha mádenıet jáne óner salasynyń úzdik qyzmetkerlerine oblys ákimi arnaıy dıplom men qarjylaı syıaqy tabys etti.
Mádenıet salasyndaǵy aldyńǵy býyn aǵalarymyz ben apalarymyzdyń izin jalǵaǵan óńirdegi daryndy urpaqtardyń Mańǵystaýdyń mádenıet salasyna bıylǵy jyly qosqan jetistikteri de az emes. Ólkemizdiń maqtanyshy horeograf-balletmeıster, rejıser Serik Sarıev jetekshilik etetin «Jorǵa» halyqtyq bı ansambli álemniń 12 elinen 250-den astam ujym qatysqan «Osh - Túrki áleminiń mádenı astanasy» festıvalinde Bas júldesin jeńip aldy; Oblystyq qýyrshaq teatry Moldova Respýblıkasynyń Kıshınev qalasynda ótken X halyqaralyq «Pod shapkoı GÝGÝSE» qýyrshaq teatrlary festıvalinen «Úzdik akterlik jumysy men qýyrshaq júrgizý sheberligi» nomınasıasyn ıelendi; Reseıdiń Sochı qalasynda ótken Halyqaralyq «Hrýstalnaıa magnolıa» baıqaýynda Qaraqıa aýdanynan Sansyzbaı Balaýsa İ oryn ıelendi; Jańaózendik «Asylmura» fólklorlyq ansambli Respýblıkalyq «Úrker» baıqaýynan Bas júldeni qanjyǵasyna baılady.
Sonymen qatar, ólkede mýzeı, kitaphana salalaryndaǵy zaman aǵymyna laıyqty sıfrlandyrý jumystarynyń da sátti ótip jatqandyǵy jáne mádenıet salasynyń bolashaq mamandaryna da jaǵdaı jasalyp jatqany barsha jurtqa málim. Sonyń bir dáleli oblystaǵy 12 jas oblys ákiminiń oqý grantyna ıe boldy. Bul Mańǵystaý óneri jetistikteriniń bir bóligi ǵana.
Sharada oblys ákimi Eraly Toǵjanov jınalǵandardy aıtýly kúnmen quttyqtady. «QR Prezıdenti Qasym-Jomart Toqaevtyń tapsyrmasyna sáıkes, uly jazýshy, kemeńger Ábish Kekilbaıulynyń 80 jyldyq mereıtoıyna arnalǵan 150-den asa is-sharalar jospary bekitilip, jazýshynyń shyǵarmashylyǵy men qaıratkerligine arnalǵan respýblıkalyq sharalardy joǵary deńgeıde ótýine atsalysýǵa shaqyramyn. Oblys ortalyǵy men Ábish aǵanyń týǵan jeri Ondy aýylynda úlken sharalar ótedi. Aǵanyń týǵan aýylynda jańa meshittiń qurylysy bastaldy. Qazaq analarynyń sımvoly «Aı Ana» eskertkishine jóndeý jumystary júrgizilýde. Ondy orta mektebiniń aldyna Ábish aǵamyzdyń bústin ornatyp, aýylǵa 8 shaqyrym asfált tósemine jóndeý jumystary júrgiziledi" – dedi aımaq basshysy.
