Mańǵystaý oblysynyń ákimi jumys saparymen Jańaózen qalasyna bardy. Aımaq basshysy sapar barysynda aldymen «Beıbitshilik» turǵyn úı kesheniniń qurylysymen tanysty. Qazirgi tańda atalmysh keshenge qarasty tórt turǵyn úıdiń qurylysy bitýge daıyn. Mamandardyń aıtýynsha, bir bóligi shilde jáne qyrkúıek aılarynda turǵyndarǵa berilmek. Odan bólek taǵy da 4 úıdiń qurylys jumystary júrgizilýde.
«Bıznes 3 kúnde» jobasy aıasynda kásibin bastaǵan Aldabergenov Naýryzbektiń jylyjaıynyń qurylysymen de tanysty. Jeke kásipkerler men mesanttardyń kómegimen Naýryzbekke jylyjaı qurylysyna qajetti jabdyqtar tolyqtaı satyp alynyp berilgen. Ol búginde alǵashqy egindi bastap ketkeni jaıynda málimdedi.
Sonymen qatar, quraq kórpeler, qyz jasaýlaryn tigip, halyq ıgiligine usynyp otyrǵan Elýbaeva Zýhra men Abısheva Ýtıbıke syndy kóp balaly analardyń da jumysymen tanysty. Adal eńbeginiń arqasynda nápáqasyn taýyp otyrǵan analar qoldaý kórsetip, qamqorlyq jasaǵan azamattarǵa alǵysyn jetkizdi.
Budan keıin aımaq basshysy Jańaózen qalasynyń turǵyndarymen, qoǵam belsendilerimen kezdesti. Jıynda qala ákimi Ádilbek Daýylbaev shahardyń ekonomıkalyq-áleýmettik damý kórsetkishterine toqtaldy.
2019 jyly negizi kapıtalǵa ınvestısıalar 10,4 mlrd. teńgeni quraǵan. Búgingi tańda qalada jumys istep turǵan 7,7 myń shaǵyn jáne orta kásipkerlik sýbektileri bar, bul 2018 jyldyń kezeńimen salystyrǵanda 19,8% - ǵa artyq kórsetkish. Qala boıynsha jańa 1 972 jumys orny ashylǵan. Al, «Nur Kapıtal" aımaqtyq baǵdarlamasy boıynsha 182 jumys ornyn ashý kózdelýde. Sonymen qatar, "Rahat" kentinde 300 oryndyq mádenıet úıiniń qurylysy júrgizilýde. "Óńirlerdi 2020 jylǵa deıin damytý" baǵdarlamasy aıasynda sý tazartý qurylǵysynan Mereı shaǵyn aýdanyna deıin sý qubyrynyń qurylysy jáne jergilikti búdjet qarajaty esebinen Rahat, Aqsý, Mereı, Juldyz shaǵyn aýdandarynda drenaj júıesi men nóser kanalızasıasynyń qurylystary júrgizilýde.
Qala turǵyndarymen kezdesken aımaq basshysy halyqtyń ómir súrý deńgeıin arttyrý – Elbasy qoıǵan basym mindetterdiń biri ekendigin, turǵyndardyń ál-aýqatyn jaqsartý maqsatynda arnaıy is-qımyl jospary jasaqtalyp, qordalanyp qalǵan ózekti máselelerdi ýaqytyly sheshý úshin osy josparǵa saı birqatar jumystar atqarylyp jatqanyn málimdedi.
Úkimettiń qoldaýynyń arqasynda qabyldanǵan orta merzimdi perspektıvaǵa arnalǵan Jańaózen qalasyn damytýdyń 2025 jylǵa deıingi jańa keshendi josparymen tanystyrdy. «Josparǵa sáıkes, «ÓzenMunaıGaz» kompanıasymen qarjylandyrylatyn mazýttalǵan topyraqty bıologıalyq tazartý jobasy boıynsha jumystar bastaldy. Jobany júzege asyrý úshin «TazaSý» JSHS qurylyp, Jańaózen qalasynyń 54 turǵyny jumysqa qabyldanatyn bolady. Aqtaý qalasynda jumys isteýge nıet bildirgen Jańaózen qalasynyń eńbek jastary úshin jataqhana qamtamasyz etilip, jalǵa alý tólemi «ÓzenMunaıGaz» qarajaty esebinen júrgizilmek. Búginde óz bıznesin ashýǵa nıet bildirýshiler úshin oblysta «Nur Kapıtal» aımaqtyq baǵdarlamasy júzege asyrylýda. Baǵdarlama boıynsha 30 mln.teńgege deıingi mólsherde 1 prosentpen nesıe qarajatyn berý qarastyrylǵan. Búgingi kúni baǵdarlamamen 27 jergilikti kásipker qarjylandyryldy. Bul jobalardy iske asyrý qosymsha 182 jumys ornyn qurýǵa múmkindik beredi. Jalpy, qalanyń tynys-tirshiligin qamtamasyz etetin ınfraqurylymnyń negizgi máseleleri búgingi tańda sheshilgen. Alaıda, halyq sanynyń belsendi ósýin eskere otyryp, Rahat jáne Teńge aýyldaryndaǵy avtojoldardy, ınjenerlik jelilerdi, sondaı-aq kóshe jaryqtaryn qosymsha salý josparda tur. Aǵymdaǵy jyly Mereı, Bostandyq, Munaıly shaǵyn aýdandarynda jáne Teńge aýylynda 18,3 km qalaishilik avtojoldar salynady. Bul jumystar maýsym aıynda bastalyp, aǵymdaǵy jyldyń jeltoqsan aıynda aıaqtalatyn bolady. Ekinshi jartyjyldyqta «ÓzenMunaıGaz» qarajaty esebinen medısınalyq ortalyqtyń qurylysy bastalyp, 2020 jyly nysan jańa joǵary sapaly jabdyqpen paıdalanýǵa beriledi», dep atap ótti qala ákimi.
Budan basqa, «Eńbek» baǵdarlamasy sheńberinde sapaly jáne jaıly ómir súrý úshin qolaıly jaǵdaı jasaý arqyly azamattardy eńbekpen tapshy soltústik óńirlerge kóshirý boıynsha sharalar iske asyrylýda. Bul úshin memlekettik qoldaý sharalary qarastyrylǵan. «ÓzenMunaıGaz» kompanıasynyń qatysýymen otbasynyń árbir múshesine 100 myń teńge kóleminde qosymsha bir jolǵy materıaldyq kómek tólenedi. Nátıjesinde, baǵdarlamada qarastyrylǵan 88 myń teńge esebin qosa alǵanda otbasynyń árbir múshesi kóshýge 188 myń teńge alady. Budan ári júıeli sharalardy júzege asyrý sheńberinde Jańaózen qalasynda jańa jobalar men jumys istep turǵan kásiporyndarda jumyspen qamtý jáne jumysqa ornalastyrý, shaǵyn jáne orta bıznesti damytý, qalanyń eńbekke jaramdy halqyn kásibı qaıta oqytý qamtamasyz etiletin bolady.
