Bizde qazir jan-jaqtan ekspansıa júrip jatyr. Saıası, ekonomıkalyq, mádenı jáne dinı ekspansıa Munyń ishinde eń qaýiptisi din ekspansıasy. Bul týraly fılologıa ǵylymdarynyń kandıdaty, jazýshy Erbolat Baıatuly din máselesine arnalǵan konferensıada aıtty, dep habarlaıdy Qamshy.kz aqparat agenttigi Arasha.kz saıtyna siltteme bere otyryp.
Jazýshynyń aıtýynsha, ulttyq sanany, ıdeıany qalyptastyra almaı jáne ol memlekettik sıpat almaı biz kóp nárseni tyńdyra almaımyz.
"Ulttyq ıdeıanyń arǵy jaǵynda ulttyq rýhanı qundylyqtar jatyr. Ol ár qazaqtyń júregine qýanysh, maqtanysh sezimin syılaý kerek jáne ulttyq minezdi qalyptastyrý qajet. Ulttyq tálim men tárbıe, salt pen sana, dástúr men ǵuryptyń barlyǵyn qaıtadan jańǵyrtsaq, ǵylymı aınalymǵa túsirsek, ıaǵnı balabaqshadan bastap osylardyń bárin bir júıege keltirsek, ózimizdiń ulttyq sıpatymyzdy saqtap qalamyz degen oıdamyn",- deıdi ol.
Sonymen qatar, ol qazirgi ýaqytta túrli dinı aǵymdar kóbeıip ketkenin, Iegova kýágerlerin aıtpaǵannyń ózinde, qasıetti dinimiz Islamnyń ózin burmalap ákep tyqpalap jatqanyn aıtty.
"Ata-babamyzdan kele jatqan salt-dástúrdi, uǵym men túsiniktiń barlyǵyn joqqa shyǵaryp, radıkaldy Islamnyń oı-pikirimen bizdi qazir ulap jatyr. Meshitter kóptep ashylyp jatyr, bir Astanamyzdyń ózinde qanshama meshit salyndy. Osy meshitke baryp jatqandardyń bári jastar dep qýanamyz, alaıda olarǵa qandaı ýaǵyzdar aıtylyp jatyr, jastardyń sanasyna ne quıyp jatyr degen máseleni áli eshkim tolyǵymen baǵamdap jatqan joq. Byltyr salafızm, ýahabızmge qarsy zań shyqty dedi, biraq onyń oryndalyp jatqanyn kórip otyrǵan joqpyz",- deıdi ol.
Onyń aıtýynsha, teris dinı aǵymdar bizdiń boıymyzdaǵy ata-babamyzdan kele jatqan túrkilik, qazaqı qasıettiń barlyǵyn joqqa shyǵarýda.
"Olar Islamnyń dinı tar, orta ǵasyrlyq kózqarasymen qaraýǵa bizdi úıretip otyr. Qazaqstan Musylmandar dinı basqarmasy bar bizde, ol úlken yqpaldy uıym. Ótkende qyzdardyń manıkúr, pedıkúryn haram dep pátýa shyǵardy deıdi. Shynymdy aıtsam, Dinı basqarmaǵa tek osymen aınalysý ǵana kerek boldy ma? Budan da mańyzdy sharýa kóp qoı. Jastardyń sanasynyń ulanyp jatqanyna mán berý kerek. Bizde tek qana qudaımen qorqytý, Allaǵa senbeýdiń arjaǵynda ólimmen qorqytý, ómirdiń jarqyn jazıra dúnıesin umyttyrý, adamnyń jasampazdyq qabiletin, ıntelektýalyn elemeý jatady. Ultyńdy súıý, ata-anańdy qadirleý, jalpy eldiń táýelsizdigin moıyndaý, oǵan qyzmet etý degen dúnıe joq. Sen Alla úshin keldiń, sonyń aldynda ketesiń degen tar uǵymdardy jas urpaǵymyzdyń sanasyna sińirip jatyr",- deıdi ol.
Sóz arasynda ol ata-analar meshitke baratyn balalaryn árdaıym baqylyp, qandaı ýaǵyzdar tyńdap júrgeninen habardar bolýǵa shaqyrdy. Sondaı-aq, konferensıaǵa jınalǵan jastarǵa árdaıym ilim men bilim jolyn tańdaý qajettigin jetkizdi.
"Ǵylymdy, bilimdi úıren qaıdan bolsa da,- degen Muhammed paıǵabardyń hadısi bar deıdi. Myna 21 ǵasyr zıatkerlik zamany, biz tek bilimmen jáne ulttyq minezben ózimizdi saqtaı alamyz. Men úshin sizderdiń musylman bolǵandaryńyzdan góri, qazaq bolyp qalǵandaryńyz mańyzdy",- dedi jazýshy.
Usynǵan: Bek Baıtas
