Atyraý oblysynyń ákimi Nurlan Noǵaev energıamen jabdyqtaý, sýmen, gazben, jylýmen qamtamasyz etý máseleleri boıynsha jınalys ótkizdi, - dep habarlaıdy Atyraý oblysynyń Óńirlik komýnıkasıalar qyzmeti.
Jınalys barysynda energetıka jáne TKSH basqarmasynyń basshysy Murat Iǵalıev oblys turǵyndaryn sýmen, jylýmen, gazben jáne elektr energıasymen úzdiksiz qamtý jaıyn aıtty.
-Búginde oblystyń 125 eldimekeni ortalyqtandyrylǵan sýmen qamtylǵan, bul -78,9%, ıaǵnı turǵyndardyń 99,2% degen sóz. 21 eldimekenge aýyz sý arnaıy kólikpen jetkiziledi, - dedi M.Iǵalıev.
-Ol eldimekenderde qansha adam turatynyn kim biledi? Sýdy kólikpen aparady, al onyń sapasyn kim baqylap otyr? Bul óz kezeginde turǵyndardyń densaýlyqtaryna tikeleı áser etedi. 13 eldimekende ortalyqtandyrylǵan sýmen qamtý júıesi joq, ıaǵnı olar sýdy qudyqtan alyp otyr. Munda da aýyz sý sapasy týraly másele bar, - dep atap ótti Nurlan Noǵaev.
Oblys ákiminiń sózinshe, búginde keıbir eldimekender aýyz sýǵa qol jetkize almaı otyr. Mysaly, Qurmanǵazy, Isataı, Jylyoı aýdandarynda problema bar.
-Jaǵdaı syn kótermeıdi, aýdandardy sýmen tolyq kólemde qamtamasyz ete almaı otyrmyz. Biriktirilgen keshenniń iske qosylýyna baılanysty sý jınaý jetkiliksiz. Sýtaratqyshty tolyq jóndeýden ótkizý kerek, - dedi «Magıstraldy sýtaratqysh» JSHS bas dırektory Madıar Berlibaev.
Osy kompanıa «Astrahan-Mańǵyshlaq» magıstraldy sýtaratqyshyn jáne oǵan japsarlas sýtartqy jelilerin basqarady. Sýtaratqysh komýnaldyq mekemelerge sý jetkizedi, ol jerde sýdyń sapasy jaqsartylyp, eldimekenderdi qamtamasyz etedi.
Kompanıa basshysy qalpyna keltirý jumystary aıasynda 56 km sýtaratqysh salynǵanyn atap ótti, sonyń arqasynda jaqyn ýaqytta sý berý kólemi 20 myń kýb metrge deıin artady. Qarbalas kezeńde dál osy mólsherde sý jetispeıdi.
2020 jyldan bastap osy sýtaratqyshtan 15 myń kýb metr tehnıkalyq sý munaıhımıa tehnoparkin qamtamasyz etetin bolady. Bul aımaq turǵyndaryn sýmen qamtý kórsetkishin biraz tómendetedi. Sondyqtan oblys ákimi bıyl paıdalanýǵa beriletin káriz tazartý kesheniniń tehnıkalyq sýyn paıdalaný máselesimen búginnen bastap aınalysý kerektigin atap ótti.
-Bizdiń strategıalyq mindetimiz – óńir turǵyndaryn sýmen qamtýdyń barlyq talaptaryn saqtaı otyryp, ekonomıkany damytý. Birine biri keseldik keltirmeýi kerek. Sý resýrstaryn tıimdi paıdalaný múmkin bolǵan kezde nege sýdy býlaný alańyna tógemiz? Odan da tıisti sapasyna deıin jetkizip, Qarabatanǵa jáne munaıhımıa keshenine aparaıyq, -dedi Nurlan Noǵaev.
Elektr energıasymen ásirese jazǵy maýsymda úzdiksiz qamtý máselesi de kún tártibinde tur. «Atyraý jaryq» AQ prezıdenti Súndet Kenjeǵalıevtiń aıtýynsha, qalada transformator stansıalaryn aýystyrý jumystaryn qolǵa alý kerek.
-Elektr energıasymen jabdyqtaýdy jaqsartý úshin qosymsha 50 transformator qosalqy stansıalaryn ornatý týraly sheshim qabyldanǵan bolatyn. Turǵyndardan shaǵymdar bar. Tómen kerneý, ásirese jazǵy ýaqytta qolaısyzdyq týdyrady. 50 jańa qosalqy stansıa ornatýmen qatar turǵyndardyń ár kezderi ózderi salyp alǵan uzyndyǵy 11 shaqyrym bolatyn elektr jelilerin aýystyrý qajet, sebebi talapqa saı emes, - dedi Súndet Kenjeǵalıev.
Energetıkter bıyl jazda elektrmen jabdyqtaýda irkilis bolmaıtynyn aıtyp sendirdi. Mańǵystaý AEK-pen, basqa da elektr energıasyn óndirýshilermen aımaqta elektr energıasyn berýdi 20-25%-ke joǵarylatý boıynsha kelisim sharttarǵa qol qoıylǵan.
-Bul máseleni búgin sheshý kerek. Erteń bári salqyndatqyshtardy paıdalanǵan kezde elektr energıasyn tutyný kólemi de artady, problemalar bolady. Sizderdiń usynyp otyrǵan qyzmetterińizdiń sapasy turǵyndardyń kóńilderinen shyǵa bermeıdi,-dedi oblys ákimi Atyraýenergosatý mekemesiniń ókiline. –Árıne, qaryzdaryn tólemegenderdiń elektr jelilerin ajyratyp tastaısyzdar. Biraq tutynýshyǵa elektr energıasyn úzdiksiz berýdi qamtamasyz etýlerińiz de kerek, tutynýshy zardap shekpeýi tıis.
Energıa qadaǵalaý jumysy da oblys ákiminiń synyna ushyrady. Elektrmen jabdyqtaý jelilerine qosylý rásimderin túsindirý máselesimen aınalysý kerek, bul jumystarda baqylaýdyń azdyǵynyń kesirinen transformator jelilerinde elektr jelisin árkim óz betimen qosyp alatyn boldy. Qala ósip keledi, jańa yqshamaýdandar boı kóterdi. Olardy komýnaldyq ınfraqurylymmen qamtý birinshi kezekte.
Jınalysty qorytyndylaǵan aımaq basshysy turǵyndardy komýnaldyq qyzmettermen úzdiksiz qamtýǵa qatysty problemalardyń sheshimin tabýy óte mańyzdy ekenin atap ótti.
-Halyq bizden sapaly qyzmet kórsetilýin kútedi. Telegramdaǵy chat-kanalǵa shaǵymdar az túspeıdi. Biri elektr energıasynda irkilis boldy dese, endi bir sý joq deıdi. Osynyń bári baqylaýda bolýyn tapsyramyn, turǵyndardy tıisti qyzmettermen tolyq qamtý kerek. Eshkimge bizdiń problemalarymyz, búdjet suranymy, tender, qurylys normalary men erejeleri sekildi máseleler qyzyq emes. Olar tıisti resýrstardy úzdiksiz alǵylary keledi, bizdiń mindetimiz – osyny qamtamasyz etý, - dep qorytyndylady Nurlan Noǵaev.