Atyraý oblysynyń ákimi Nurlan Noǵaev memlekettik – jekemenshik áriptestikti damytý máselesi boıynsha keńes ótkizdi.
Atyraý oblysy ekonomıka jáne búdjettik josparlaý basqarmasynyń basshysy Aıdar Nuralıevtiń habarlaýynsha, óńirde memlekettik – jekemenshik áriptestik (MJÁ) aıasynda jalpy somasy 21,4 mlrd teńge bes joba iske asyp jatyr.
Oblystyq máslıhattyń taıaýda ótken sesıasynda taǵy 3 joba maquldandy: Qulsarynyń kóshelerin jaryqtandyrý; Atyraý qalasynda beıne-foto tirkeý kameralaryn ornatý; oblys ortalyǵyn keshendi kógaldandyrý.
Barlyǵy segiz joba, jalpy quny 38,7 mlrd teńge.
Sonymen qatar, A.Nuralıev MJÁ iske asyrýdyń problemalyq tustaryna da toqtaldy. 2017 jyldan beri ekonomıka basqarmasy 60 jobany taldap, júzege aspaı qalǵan jobalar bar ekenin aıtty.
Spıkerdiń aıtýynsha, Ulttyq ekonomıka mınıstrligi barlyq MJÁ jobalaryn 3 kategorıaǵa bólgen. Birinshisi – jekemenshik áriptestiń ınvestısıalary men operasıalyq shyǵyndaryn tolyqtaı búdjetten óteý. Ekinshisi - ınvestısıalardy búdjetten ishinara óteý. Úshinshisi - búdjetten óteý múldem bolmaıdy, salynǵan ınvestısıalar kórsetilgen qyzmetter men memlekettik tapsyrys esebinen qaıtarylady.
Atyraý oblysyndaǵy 8 jobanyń jeteýi birinshi kategorıaǵa, bireýi ekinshi kategorıaǵa jatady. A.Nuralıev jergilikti ınvestorlardy, aýyl kásipkerlerin keńirek tartý qajet ekenin aıtty jáne mysal retinde osyndaı jumys júrip jatqan Qyzylorda oblysyn keltirdi. Taıaý arada basqarma memlekettik qyzmetshilerdi MJÁ tetigine úıretedi.
Oblys ákimi N.Noǵaev júzege asyp jatqan jobalardyń mańyzdylyǵyn atap ótti.
- Jobalardyń áleýmettik tıimdiligi aıqyn. Máselen, foto-beıne tirkeý jobasyn iske asyrý jolda da, qoǵamdyq jerlerde de azamattardyń qaýipsizdigin kúsheıtedi,-dep esepteıdi óńir basshysy.- Qazir osy joba boıynsha bizde 759 kamera iske qosylǵan. Taǵy 774 dana kamera ornatý josparlanyp otyr, sondaı-aq, 51 jol qıylysy men 153 jol ýchaskesi jol qozǵalysy erejeleriniń buzylýyn foto-beıne tirkeý kameralarymen qamtamasyz etiledi.
Kóshelerdi jaryqtandyrý jobasy da mańyzdy, paıdaly. Búginde oblys ortalyǵynyń júzdegen kósheleri jaryqtandyrylǵan. Energıa únemdeý tehnologıalary qoldanylǵandyqtan, olardy paıdalanýda bújet qarajaty únemdeledi.
- Osy jumysty jalǵastyrý, sonyń ishinde, úshinshi kategorıa boıynsha iske asatyn jobalardy kóbeıtý qajet. Iaǵnı, kásipkerler ózderi salǵan nysandar sanyn ulǵaıtyp, olardy memlekettik tapsyryspen qamtamasyz etý kerek,-dedi Nurlan Noǵaev.
Oblystyq densaýlyq saqtaý basqarmasynyń basshysy Mánshúk Aımýrzıevanyń baıandamasynda MJÁ arqyly úsh joba júzege asyrylǵany aıtyldy: eki medısınalyq mekemeni senimdi basqarýǵa berý jáne ókpe týberkýlezin erte dıagnostıkalaý boıynsha is-sharalar kesheni.
Taǵy úsh joba iske asyrylý kezeńinde. Al, 2023 jylǵa deıin 13,1 mlrd teńge somaǵa onshaqty jobany iske asyrý usynylyp otyr: dárigerlik ambýlatorıalar, aýrýhanalar, jas mamandarǵa arnalǵan jataqhana, medısına kolejiniń sport kesheniniń qurylysy, taǵy basqalary.
