Elbasy Nursultan Ábishuly Nazarbaev óz Joldaýlarynda áleýmettiń áleýetin arttyrýǵa aıryqsha basymdyq berýmen keledi. Tipti, 2020 jylǵa deıin respýblıka turǵyndarynyń 98 paıyzy ortalyqtandyrylǵan aýyzsýǵa qoljetkizýi qajettigin basa aıtqan tapsyrmasy da búginde júzege asýda. Oǵan dálel retinde bıyl Taraz qalasy mańyndaǵy 7 birdeı eldi mekenniń aýyzsý júıesine qosylatyndyǵyn aıtsaq bolady.
Bul jaıynda oblys ákimi Asqar Myrzahmetovtiń tóraǵalyǵymen ótken jıynda málimdeldi. Jáne oblys ákimdiginiń energetıka jáne turǵyn-úı komýnaldyq sharýashylyq basqarmasynyń basshysy Nurlan Aldamjarovtyń sózine súıensek, qazir joba boıynda jobalaý-smetalyq qujattar daıyndalý ústinde eken.
Jalpy resmı derekke súıensek, búginde Taraz turǵyndarynyń toqsan paıyzy taza aýyzsýdy paıdalanyp otyr. Jyl sońyna deıin josparlanǵan jeti eldi mekendegi qurylys aıaqtalsa, qala tolyq taza aýyzsýmen qamtylady. Osy jumystardyń nátıjesinde óńirdiń reıtıńisin respýblıka deńgeıinde kóterýge múmkindik týmaq.
Oblystaǵy aýdan turǵyndarynyń aýyzsýmen qamtylý deńgeıine toqtalsaq, Shý aýdany 60 paıyzben kósh bastap tur. Bul ólkede Qosqudyq aýylynyń másele sheshimin tapsa, aýdan halqynyń 80 paıyzy sapaly aýyzsýǵa qol jetkizetin bolady. Atalmysh máseleni óńir basshysy Asqar Isabekuly da jiti baqylaýynda ustap, jumysty uzaqqa sozbaı sheshý kerektigine nazar aýdarýda.
Negizi basqarma basshysy Nurlan Aldamjarov byltyrǵy jylǵy baıandamasynda 2018 jyldyń 1 qańtarynda 4 qala boıynsha ortalyqtandyrylǵan aýyzsýmen qamtý kórsetkishi 84,7 paıyzdy quraǵanyn aıtqan bolatyn. Jáne jyl aıaǵyna deıin kórsetkish 86 paıyzǵa jetetinin jetkizgen-di. Ras, bul mejeni eńserýge Taraz qalasynyń «Býryl A, B, V» turǵyn alqabyndaǵy servıstik jelilerdiń qurylysyna respýblıkalyq jáne oblystyq búdjetten 334,6 mıllıon teńge bólinýi kóp septigin tıgizgen-di. Endi mine, bıyl taǵy 7 eldi meken taza aýyzsý júıesine qosylyp, qara halyqty qýanyshqa keneltkeli otyr.
Jalpy, oblys boıynsha ortalyqtandyrylǵan aýyzsýmen qamtylǵan 199 eldi meken bar. Al ondaǵy 130 myń otbasy áli de sýdy syrttan tasyp ishedi. Asqar Isabekuly sala mamandarymen bas qosqan jıynda turǵyndardy 100 paıyz tolyǵymen ortalyqtandyrylǵan aýyzsý júıesine qosý kerektigin aıtyp, naqty tapsyrmalar júktedi.
Budan bólek, basqosýda aýyzsýdy saǵattap keste boıynsha tutynatyn turǵyndardyń da máselesi maıshammen qaralyp, jaýaptylardan jaýap alyndy.
Árıne, barlyq másele birden sheshilmeıtini belgili. Dese de, bıyl 7 eldi mekenniń turǵyndary endi taza aýyzsýdy tasyp ishpeıtini janǵa jylý beredi.
Jaıdar Azamat
