Elbasynyń «Bolashaqqa baǵdar: rýhanı jańǵyrý» atty maqalasynda «Gýmanıtarlyq bilim. Qazaq tilindegi 100 jańa oqýlyq» jobasynyń júzege asatyndyǵy jazylǵan edi. Bul bastama búginde óz baǵdaryn taýyp, jemisin berýde.

Aıta ketý kerek, baǵdarlamanyń «100 jańa oqýlyq» jobasynyń negizgi maqsaty – memlekettik tilde gýmanıtarlyq bilim baǵyttary boıynsha stýdentterdiń tolyqqandy bilim alýy úshin jaǵdaılar jasaý, álemniń ozyq oqýlyqtaryn túpnusqadan qazaq tiline aýdarý. Búgingi tańda Jambyl oblysyna joba aıasynda aýdarylǵan 19 kitaptyń 7000-ǵa jýyq danasy  kelip tústi.

Atalǵan kitaptar oblystyq, qalalyq jáne aýdandyq jáne joǵary oqý oryndarynyń kitaphanalaryna úlestirilip berildi. Qazirgi tańda kitaptardyń elektrondy úlgileri ázirlenip, ınternet jelilerine ornalastyrylǵan. Jobalyq ofıs kitaptardyń QR-kodtary bederlengen arnaıy taqtaıshalar ázirlep, Taraz qalasy men aýdan ortalyqtarynda adam kóp shoǵyrlanatyn oryndarǵa ornalastyrýdy qolǵa alýda.

Sonymen qatar jobalyq ofıs M.H.Dýlatı atyndaǵy Taraz memlekettik ýnıversıtetiniń qoldaýymen ár apta saıyn bir kitapty tanystyryp keledi. Osy jyly 30 kitap aýdarylyp, oqyrmanǵa tanystyrylady dep josparlanýda.

Sondaı-aq aımaqta latyn álipbıine kezeń-kezeńimen kóshý boıynsha da josparly  jumystar júrgizilýde.

– QR Premer-Mınıstriniń 2018 jylǵy 13 naýryzdaǵy №27 Ókimimen qazaq tili álipbıin latyn grafıkasyna 2025 jylǵa deıin kezeń-kezeńimen kóshirý jónindegi is-sharalar jospary bekitilgen. Osyǵan sáıkes oblystyq is-sharalar jospary ázirlenip, júıeli jumystar jolǵa qoıylǵan.

Jańa qazaq álipbıin óńir turǵyndaryna keńinen túsindirý maqsatynda arnaıy beınerolık ázirlenip, aqparattyq-túsindirý jumystarynda paıdalaný úshin tıisti memlekettik organdarǵa joldandy.

M.H.Dýlatı atyndaǵy Taraz memlekettik ýnıversıtetiniń janynan Latyn álipbıin úıretý oqý-ádistemelik kabıneti, Taraz memlekettik pedagogıkalyq ýnıversıtetinde «Qazaq fılologıasy jáne latyn grafıkasyn oqytý ádistemesi» kafedrasy, oblys ákimdiginiń tilderdi damytý basqarmasynyń Tilderdi oqytý ortalyǵynda «Rýhanı jańǵyrý: latyn álipbıi» kabıneti ashylyp, latyn negizdi qazaq álipbıine kóshý jóninde oblys turǵyndaryna ádistemelik kómekter kórsetildi,-deıdi «Jambyl oblysynyń «Rýhanı jańǵyrý» jobalyq ofısi» mekemesiniń dırektory Serikbol Berikqoja.

Latyn grafıkasyna negizdelgen qazaq jazýyn túsindirý, azamattardyń jańa álipbıdi úırenýlerine múmkindikter jasaý maqsatynda oblystyq tilderdi damytý basqarmasy tarapynan 4 áleýmettik joba aıasynda 120-dan asa is-shara ótkizilip, oǵan 150 myńǵa jýyq adam qamtylǵan. Sondaı-aq  bıylǵy jyly 2 áleýmettik joba júzege asyrylýda.

Baqyt Jalǵas