Elbasynyń «Bolashaqqa baǵdar: rýhanı jańǵyrý» atty maqalasy aıasynda Jambylda jańa mekeme paıda boldy. Jambyl oblysy ákimdiginiń qaýlysymen bıylǵy aqpan aıynda qurylǵan «Jambyl oblysynyń «Rýhanı jańǵyrý» jobalyq ofısi» komýnaldyq memlekettik mekemesiniń quramy tolyqtaı jasaqtaldy.  Al, onyń basshylyǵyna Taraz qalalyq máslıhatynyń depýtaty Serikbol Berikqoja taǵaıyndaldy.

Mekeme qyzmetiniń máni qoǵamdyq sanany jańǵyrtýmen tyǵyz baılanysty. Al maqsaty – Elbasy N.Á.Nazarbaevtyń «Bolashaqqa baǵdar: rýhanı jańǵyrý» baǵdarlamasy men «Uly dalanyń jeti qyry» jobasynyń júzege asyrylýyn baqylaý. Baǵdarlamalyq maqalalar aıasyndaǵy barlyq arnaıy jobalary boıynsha jumys júrgizý.

Jalpy, mekeme jańadan qurylǵandyqtan aldaǵy ýaqytta kóptegen is-sharalar men jobalardy júzege asyrý josparlanýda. Osy maqsatta jobalyq ofıs basqarmalardaǵy, aýdandar men Taraz qalasy ákimdigindegi «Rýhanı jańǵyrý» baǵdarlamasyn iske asyratyn jaýapty qyzmetkerlermen, úkimettik emes uıymdardyń kóshbasshylarymen, buqaralyq aqparat quraldary men qoǵam belsendilerimen kezdesýler ótkizilip, jumysty júıeleýge, jandandyrýǵa qatysty kóptegen usynystar jınalǵan.

Basty mańyzdy jobalarǵa toqtalyp óteıin. Aldaǵy ýaqytta «Áýlıeata úmiti» syılyǵyn uıymdastyrýdy josparlap otyrmyz. Maqsatymyz – jas talanttardyń eńbegin baǵalaý, olardy yntalandyrý. Jambyl jeri dańqty da talantty tulǵalardyń kindik qany tamǵan jer desek artyq emes. Mine, sol azamattar ózinen keıingi urpaqqa senim bildire otyryp, «Sen osy óńirdiń menen keıingi jaryq juldyzy bolýyń tıis» degen uranmen syılyqty óz qolymen tabystap, jastarǵa jiger beredi degen senimdemin. Sonymen qatar oblysymyzdaǵy qaıyrymdy jandar men kásipkerlerdi yntalandyrý maqsatynda «Jomart júrek» oblystyq baıqaýyn uıymdastyrýdy da qolǵa alyp otyrmyz.

Sondaı-aq, «Qazaqstannyń sakraldy geografıasy» jobasy aıasynda «Jaınaǵan Jambylym» atty fotojınaq basyp shyǵarý, «Týǵan jerge týyńdy tik!» forýmyn, «Latyn álipbıi – rýhanı tutastyq negizi» atty respýblıkalyq konferensıa uıymdastyrý kózdelýde.

Oblysymyzdaǵy aǵa býyn men jas tolqynnyń shyǵarmashylyq  baılanysyn nyǵaıtý maqsatynda aqyndardyń dýelin, ultyq sportty damytý maqsatynda tegin úıirmeler men is-sharalar uıymdastyrýdy josparlap otyrmyz. «Uly dalanyń uly esimderi» ataýymen «Sanaly TALKS» ıntellektýaldy keshterin, «Qoǵamdyq leksıa» áleýmettik jobasyn, «Jambyl jaýharlary» ataýymen oblysymyzdyń tarıhı-mádenı keshenderi men tabıǵatyn, kórnekti jerlerin dáripteý maqsatynda oblystyq foto kórmeni de qolǵa alsaq degen jospar bar,-deıdi Serikbol Berikqoja.

 Baqyt Jalǵas