Shveısarıanyń sot-medısınalyq saraptamasy Rahat Álıevtiń zorlyqpen óltirilýiniń dálelin tappady , - dep habarlaıdy "RIA Novostı".
"Zorlaý jáne ýlaý áreketterine qatysty dálel joq", - dep keltirdi Vena prokýrorynyń baspasóz hatshysy Nına Býssektiń málimdemesin Kleine Zeitung basylymy. Basylymnyń málimetinshe, sot-medısınalyq saraptamasynyń qorytyndysy Álıev óz-ózine qol saldy degen bastapqy tujyrymdy rastady.
Buǵan deıin osyǵan uqsas tujyrymǵa Vena koroneri Danıel Rısser kelgen bolatyn, ol máıitke tıisti zertteýlerdi birden júrgizdi. Alaıda Rısser búginge deıin naqty jazbasha jaýap jazǵan joq, ol tek máıittiń ashylǵany týraly aldyn ala esep berdi.
Eske sala keteıik, Rahat Álıev Venadaǵy Iozefshtadt túrmesinde qaıtys boldy. Ol 23 aqpanda túnde asylyp qalǵan kúıi tabyldy. Keıin Avstrıanyń ádilet mınıstrligi burynǵy elshiniń óz-ózine qol jumsaǵanyn resmı túrde rastady. Quqyq qorǵaý organdary Rahat Álıevti ótken jyldyń 5 maýsymy kúni Venada ustaǵan edi. QR Bas prokýratýrasy ony ustaýǵa "Nurbank" AQ top-menedjerleri Temirálıev pen Hasenovti urlaý men óltirýge qatysty tergeý materıaldary negiz bolǵanyn habarlady. Qazaqstanda burynǵy elshige 40 jylǵa bas bostandyǵynan aıyrý syrttaı jazasy kesilgen bolatyn.
