Qazaqstanda “halal jezókshelik” degen uǵym paıda boldy. Áıelder radıkaldy ıslam aǵymyna túsken er azamattarǵa turmysqa shyǵyp, keıinnen kúıeýleri “talaq” (ajyrasý) arqyly aıyrylysyp, áıelderin dostaryna ótkizip jatady. Dinshil er azamattar áıelderinen ajyrasyp, dostaryna áıel etip tabystaý úshin “talaq” sózin aıtady eken.  Bul júıege tap bolǵan áıelder keminde 3-5 ret kúıeýge shyǵyp jatatyny belgili boldy. Sol aralyqta júkti bolyp jatqan áıelder, tipti balalarynyń ákesi kim ekenin bilmeıtinderin aıtýda. “Halal jezóksheliktiń” qurbany bolǵan Atyraý qalasynyń 35 jastaǵy turǵyny 9 ret kúıeýge shyqqanyn “Radıotochkaǵa” aıtyp bergen. Ózi aýqatty turatynyna qaramastan, 5 jyl ishinde 9 ret ajyrasyp úlgergen. Búginde ol týǵan ulynyń ákesi kim ekenin dóp basyp aıta almaı otyr. “5 jyl buryn men namazhan jigitti kezdestirdim. Biz otbasyly bolyp, 1 jyl birge turdyq. Biraq bir kúni ekeýimiz sózge keliskende, kúıeýim ajyrasatynyn málimdedi. Ol dosyna habarlasyp, meni oǵan áıeldikke ótkizetinin aıtty. Men qarsy bolsam da, aqyry kelisimimdi aldy. Sóıtip dosynyń áıeli bolyp shyǵa keldim. Keıin ol da meni ózge dosyna ótkizdi”,- deıdi atyraýlyq áıel. Qazaqstandyq dintanýshylardyń aıtýynsha, mundaı qadamǵa baratyndardyń kóbi radıkaldy ıslam aǵymynyń ókilderi. Nátıjesinde elimizde júzdegen bala ákesiniń kim ekenin bilmeı ósýde. “Islam qaǵıdalaryna sáıkes “talaq” sózin tek jaǵdaı qatty ýshyqqan kezde ǵana aıtady. Bul úrdistiń óz qatań erejeleri bar. Arnaıy hadıster de keltirilgen. “Talaq” sózin aıtqannyń ózinde, musylmandar úsh aı on kún kútip, sodan keıin ǵana eki bólek keted”, – dep túsindirdi dintanýshy Muhıddın Patteev. Mundaı jaǵdaıǵa dýshar bolǵan áıelder ásirese Batys Qazaqstan men Almatyda jıi kezdesedi eken. Dintanýshylar olardyń kóbi din turǵysynan saýaty joq bolǵandyqtan, osyndaı aldaýdyń qurbanyna aınalyp otyrǵandaryn aıtýda.

Nur.kz