Qandastarymyzdyń turaqty tirkeýge turýyna kedergi bolyp kelgen Úkimettiń №111 Qaýlysyndaǵy aty shýly EKİ ANYQTAMAǴA, onyń ishinde «Sottylyǵ» jónindegi qujatqa baılanysy «DAT» gazeti arqyly UQK-niń tóraǵasy Nurtaı Ábiqaevtyń atyna ashyq hat jazǵan bolatynbyz. Ashyq hat jazýǵa EKİ ANYQTAMAny Májiliste jumys toby talqylap jatqan «Qazaqstan Respýblıkasynyń keıbir zańnamalyq aktilerine halyqtyń kóshi-qony jáne jumyspen qamtylýy máseleleri boıynsha ózgerister men tolyqtyrýlar engizý týraly» Zań jobasynan alyp tastaýǵa UQK-niń de qatysy bar degen áldekimderdiń sózi sebep bolǵan edi.
Olaı emes eken. Mine, jaqynda sol hatymyzǵa UQK-nen jaýap keldi.
Hatta biz tarapynan qoıylǵan usynysty qaraǵanyn aıta kelip, «Óz tarapyńyzdan kóterilip otyrǵan suraqtardy qarastyrý Ulttyq Qaýipsizdik Kómıtetiniń quzyryna jatpaıdy» depti Departamet ókili A.Qaıyrov. Sonymen birge, «Qazaqstanda kóshi-qon salasynda memlekettik saıaatty qalyptastyrý Qazaqstan Respýblıkasynyń Ulttyq ekonomıka mınıstrligine júktelgen (2014j.24.09 №1011 QR Úkimet qaýlysy). Osyǵan oraı, óz usynystaryńyz boıynsha tolyq túsinik alý úshin joǵaryda kórsetilgen quzyrly memlekettik organǵa júginý kerektigin eskertemiz» delinipti jaýap hatta.
Osy aralyqta «Sottylyqqa» qatysty máseleniń Májilistegi jumys tobynyń segizinshi otyrysynda OŃ sheshilgenin «Qamshy.kz» saıyty arqyly aıtqamyz. Eger, osy jańa Zań jobasy osy maquldanǵan tolyqtyrýlar men ózgerister boıynsha aldaǵy kúnderde Senattyń maquldaýynan aman ótip, Elbasynyń qoly qoıylsa, qandastarymyzdan «Sottylyǵy» jaıly anyqtama da talap etilmeıdi.
Sóz sońynda hatymdy qadaǵalap, túsinik jasap, jaýap bergen UQK-ne shyn júrekten alǵys aıtamyn. Ult Kóshbasshysy Nursultan Nazarbaevtyń osynaý Zań jobasy jónindegi tapsyrmasynyń qaltqysyz oryndalatynyna, Qazaq kóshiniń joly ashylatynyna senemin!
Qurmetpen,
Aýyt Muqıbek
23.06.2015
Astana
