Batýtta sekirý, sándi paravoz jáne atraksıon. Oıyn-saýyq ortalyǵyna alǵash ret kelgen Mılana Tormınaǵa munyń bári qıal ǵajaıyp ertegi sekildi. №4 balalar úıiniń tárbıelenýshisine mundaı demalysty «Kcell» uıaly baılanys kompanıasy uıymdastyryp otyr. Demeýshilerdiń tamasha tartýyn alǵan jasóspirim kópten beri armandaǵan oıyn atraksıonyna da mindi.
Mılana Tormına, №4 balalar úıiniń tárbıelenýshisi: «Men ánshi bolǵym keledi. Óıtkeni án aıtqanda ánshilerdiń daýysy ádemi bolady. Búgin aǵalarǵa rahmet aıtqym keledi.»
KSELL kompanıasy osylaısha demalysqa shyqqan balǵyndardyń kóńilin kóterip baqty. «Fırkan» qıal álemine kelgen balalar úıiniń 100-ge jýyq tárbıelenýshisine táttiler taratylyp, syılyqtar tabystaldy. Sondaı-aq 3D formatynda múltfılmdi tamashalady. Óz kezeginde ata-ananyń aıaly alaqanyna muqtaj balaqaılar mundaı demalysqa dán rızashylyqtaryn bildirdi.
Janat Jantýrın, «KSELL» AQ Shymkent qalalyq fılıalynyń basshysy: «Balalar — bizdiń bolashaǵymyz. Olar qajettini alýǵa quqyly. Kóp nárseniń de qajeti joq qoı. Tek kóńil aýdarylsa. Biz aksıa uıymdastyrýdy qup kórdik. Alda olardy kóptegen tosyn syılyqtar kútip tur.»
Kompanıa qyzmetkerleriniń aıtýynsha, mundaı qaıyrymdylyq aksıalary turaqty túrde uıymdastyrylatyn bolady. Sebebi kompanıa ókilderi árbir balanyń demalys ýaqytyn qyzyqty ótkizýine atsalysýdy ortaq mindetimiz dep biledi.
