Ońtústik Qazaqstanda kópqabatty turǵyn úıde shyqqan órt 21 adamnyń ómirin jalmaı jazdady. Qaıǵyly oqıǵa  Kentaý qalasynda bolǵan. Al ońbaı kúıip qalǵandardyń deni balalar. Ásirese denesiniń 25 paıyzyn kúıik shalǵan 8 jasar qyz ben onyń ájesiniń háli múshkil. Al bir mezette baspanasyz qalǵandar qazir týystaryn jaǵalap ketken. Tún aýa myna úıdiń úshinshi qabatynan shyqqan tilsiz jaý birden joǵarydaǵy páterlerdi sharpyǵan. Shyrt uıqyda jatqan turǵyndar zattaryn jınamaq túgili kók tútin arasynan bir-birin tappaı áýrege túsipti. Qaıta sol mańda kezdeısoq ótip bara jatqan Almas Taǵaıbekov esimdi azamat ot arasynan 10 shaqty balany shyǵaryp alǵan. Qalǵandaryn órt sóndirýshiler qutqardy. Al aýrýhanaǵa jetkizilgen 21 adamnyń, 12-si balalar. Ásirese jansaqtaý bóliminde jatqan áıel men nemeresiniń jaǵdaıy aýyr. Qýanysh Seıilbekov, Kentaý qalalyq aýrýhanasynyń hırýrgi: -Qyz balanyń dıagnozy eki sanynyń termıalyq kúıigi. Kómir qyshqyl gazymen ýlaný. Jalpy jaǵdaıy aýyr. IVL apparatymen demalýda. Al, 48-shi jylǵy apanyń da jalpy jaǵdaıy aýyr. Ol kiside IVL apparatymen demalýda. Kómir qyshqyl gazymen ýlanýdyń aýyr dárejeleri. Jansaqtaý bóliminiń aldyn toryǵan bul kisiler túngi órtten pátersiz qalǵan turǵyndar. Tilsiz jaý 3 otbasynyń shańyraǵyn kúlge aınaldyrǵan. Qymbat Esenbekova, Kentaý qalasynyń turǵyny: -Úıimniń bári dúnıeniń bári, qujattar  órtenip ketken. Túk joq úıde. Qutqarý kezinde mamandar podezdegi búkil esikterdi syndyryp kirgen. Endi sonyń bári jańalanyp, al qyzyl jalyn jalmaǵan páterler kúlden tazartylyp jatyr. Oblys basshylary jergilikti shendilerge bir aıǵa jetkizbeı turǵyndardy óz páterlerine kirgizińder degen talap qoıypty. Nurjan Táshimov, Kentaý qalasy ákiminiń orynbasary: -Qazirgi tańda búkil osyndaǵy zardap shekken 3 páterdiń 2 páterin jóndep beremiz. Búkil tolyǵymen, terezelerin aýystyryp beremiz.  Turatyn evakýasıa úshin meken-jaı usynyldy. Olardyń qazirgi tańda eki otbasy kelisip, meken-jaıǵa barýǵa kelisti. Qalǵandary bas tartty. Ázirge órttiń jaı-japsary anyqtalyp jatyr. Degenmen, tilsiz jaýdyń shyǵýyna úshinshi qabattaǵy turǵynnyń shylymyn óshirmeı uıyqtap qalýy sebep bolýy múmkin delinýde. Bul boıynsha qylmystyq is te qozǵaldy. Al, órt sóndirýshilerden buryn jetip, on búldirshindi qutqarǵan Almas Taǵaıbekovti atqaminerler jergilikti batyr retinde marapattamaqshy.