Ońtústik Qazaqstan oblysy Túlkibas aýdanyndaǵy «Arman» balalardy saýyqtyrý lagerinde 2015 jyldyń alǵashqy demalys kezeńi ashyldy, dep habarlady oblys ákiminiń baspasóz qyzmeti. Turmys jaǵdaıy tómen otbasylar men jetim balalar sanatyndaǵy 300 bala jazǵy demalys kezeńiniń alǵashqy kúnderin ózimen teteles balalarmen ótkizýge múmkindik aldy. Lager basshylyǵy balalardyń tyńǵylyqty demalýy úshin kóptegen qyzyqty sharalar uıymdastyrmaq. Olardyń qatarynda túrli spartakıadalar, áskerı-patrıottyq oıyndar, júzý men baseındegi oıyndar, árkelki baıqaýlar men ózge de qyzyqty sharalar bar. Sonymen qatar lagerde birneshe óner úıirmeleri de ashylyp, jumys júrgizýde. Munda balalar 5 mezgil tamaq ishedi. Demalýshylarǵa usynylatyn taǵamdar sanıtarlyq qaýipsizdik talaptaryna sáıkes qatań tekseriledi. Demalyp jatqan balalardyń densaýlyǵyn saqtaý men nyǵaıtý máselesi de lagerdegi medısına qyzmetkerleriniń qatań baqylaýynda. «Lagerde balalar ýaqytyn tıimdi ótkizip, jaqsy tynyǵady dep oılaımyn. Olardyń árbir kúni qyzyqty ótýi úshin biz bilim deńgeıin anyqtaıtyn vıktorına oıyndarynan bastap sporttyq jarystarǵa deıin qamtylǵan jarqyn baǵdarlamalar ázirledik», - deıdi lager dırektory Klara Dınaeva. Alǵashqy demalýshylar legin qabyldaǵan lagerde osy ataýly kúnge oraı saltanatty shara ótti. Kesh qonaqtary «Aıgólek» halyqtyq horegrafıalyq ansámbl ujymy men ánshi, kompozıtor Marat Omarov óz konserttik baǵdarlamalaryn usynyp, balalardy úlken qýanyshqa bóledi. Bıyl jazǵy maýsymda Ońtústik Qazaqstandaǵy 24 jazǵy saýyqtyrý lagerinde 50 myńǵa jýyq bala demalady. Osy demalys oryndaryna oblystan áleýmettik turmysy tómen, jetim jáne jartylaı jetim on myńǵa jýyq búldirshin lagerlerge tegin jiberiledi. Sondaı-aq, 6500 bala ózge óńirler men shet elderdegi lagerlerge barsa, qala ishindegi oqýshylar saraıynyń janyndaǵy «Baldaýren» lageri 600 balany tegin qabyldaıdy.