Jaqyn kúnderi Mańǵystaý aýdanynyń Shetpe kentinde zamanaýı medısınalyq ortalyq jumysyn bastaıdy. «Órken» degen atpen jańadan ashylatyn ortalyq turǵyndarǵa aqyly túrde qyzmet kórsetpek. Jańa nysandy jeke kásipker Baıqadam Kýsımbaev «Bıznestiń jol kartasy -2020» baǵdarlamasy aıasynda «Damý» Qorynyń kepildigimen alynǵan qarjyǵa iske qospaq.

Ortalyq basshysy «Damý» kásipkerlikti damytý qorynyń Mańǵystaý oblystyq fılıalynyń kepildigimen «Qazaqstan Halyq banki» AQ –nan 5 jylǵa 15 mln.teńge nesıe alǵan.

«Otbasylyq kásibimizdi órkendetý maqsatynda jeke medısınalyq ortalyqty iske qosýdy qolǵa aldyq. Budan bólek aýdanymyzda eki jekemenshik dárihanamyz jumys jasaıdy. Al, bul joly alǵan qarjyǵa laborotorıalyq, ÝZI, júrek, tis túsiretin apparattar, qajetti quraldardy satyp almaqshymyn. Turǵyndarǵa aqyly túrde qyzmet kórsetemiz, baǵamyz da qoljetimdi bolady. Endi Mańǵystaý aýdanynyń turǵyndary qalaǵa sabylyp qatynamaı, aýdan ortalyǵyna da qajetti medısınalyq kómekke júgine alatyn bolady. Óıtkeni Shetpe kentinde bir ǵana aýdandyq aýrýhana jumys jasaıdy, ol jerde uzyn-sonar kezek»,-deıdi Baıqadam Kýsımbaev.

Baıqadam Kýsımbaev-medısına salasynda 13 jyl abyroıly ári jemisti eńbek etken. Elge etken eńbegi elenip, hırýrg-dáriger 2011 jyly «Aýdandyq úzdik dáriger» atalymymen marapattalǵan.  Aq halatty abzal jan osy ýaqytqa deıin 700-ge jýyq naýqasqa ota jasap, halyqtyń yqylasyna bólenipti. Sońǵy jyldary aýdandyq aýrýhanada hırýrgıa bóliminiń meńgerýshisi qyzmetin abyroımen atqarǵan. Endi mine, jeke kásibin dóńgeletip, densaýlyq saqtaý salasynyń damýyna jeke kásipker retinde  úlesin qospaq nıette. Kásipkerdiń bastamasymen iske qosylatyn ortalyqta aýyl turǵyndary úshin terapevt, ÝZI dárigeri, hırýrg, nevropatolog, pedıatr, kardıolog dárigerler jumys jasaıtyn bolady. Keń de jaryq ǵımaratta zamanaýı qural-jabdyqtarmen turǵyndarǵa sapaly, medısınalyq qyzmet kórsetilmek.  Kásipkerdiń aıtýynsha, ortalyq jaqyn arada halyq ıgiligine jumys jasaıtyn bolady.