Reseı Federasıasynyń Pskov oblysynda ótip jatqan «Desanttyq vzvod» konkýrsynyń asa qıyn kezeńderiniń biri, desantshylardyń dáldikke jeke sekirý synaǵy boldy. Sekirýler "qanat" klassıfıkasıasyndaǵy basqarylatyn serıalyq parashúttik júıelerimen jasalyndy. Atalmysh kezeńde 21 eldiń desantshy-parashútıstteri tartysqa tústi.

Parashútpen dáldikke sekirý Mı-8 tikushaqtarynan 1200-1300 metr bıiktikten oryndaldy. Olardyń sekirý ıntervaldary úsh sekýndti qurap, erkin qalyqtaý jaǵdaıynda da úsh sekýndtan kem bolmaýy tıis bolatyn. Ereje boıynsha parashútıstter áskerı kıim úlgide, qarý-jaraqpen jáne desantshylar shleminde bolýy tıisti. Jerge qoný barysynda dıametri 10 metrdi quraıtyn qyzyl sheńberge aıaqtaryn tıgizýi qajet edi. Nátıjeni esepteý sheńberdiń ortasynda ornalasqan qyzyl jastyqshadan júrgizilip otyrdy. Ár elden úsh desantshy sekirip, olardyń sheńber ortasynan aýytqyǵan qashyqtyq mólsheri boıynsha jeńimpazdar anyqtaldy.

Osy kezeńniń nátıjesinde Qazaqstandyq desantshylar ekinshi oryndy ıelendi. Olar Belarýs Respýblıkasy desantshylarynan 50 santımetrge ǵana utyldy, úshinshi oryndy Marokko eliniń áskerıleri ıelendi. Qazaqstandyq desantshylar arasynda úzdik nátıjeni maıor Vácheslav Loparev kórsetti. Ol sheńberdiń dál ortasyna qonyp, barlyǵyn tań qaldyrdy.

Qazaqstandyq komandanyń nusqaýshy-parashútısti maıor Azamat Abdiraıymnyń aıtýynsha, qazaqstandyq parashútıster saıystyń osy kezeńine 7 seksıalyq parashúttik júıesimen daıyndalǵan.

"Alaıdy osy jerge kelgende tóreshiler kollegıasy bizdiń parashútterdi sporttyq dep tanyp, ózderiniń 9 seksıaly Arbalet-2 parashúttik júıesin usyndy. Alaıda soǵan qaramastan, tanystyq sekirýlerdi jasamaı-aq, beıtanys parashúttermen bizdiń jigitter jaqsy nátıje kórsete bildi", – dep oıymen bólisti.

Esterińizge sala ketsek, qazaqstandyq áskerı qyzmetshiler 3-17 tamyz aralyǵynda Reseı Federasıasynyń Pskov oblysynda halyqaralyq armıalyq oıyndarǵa qatysýda.

Rýstem Igısınov,

 kapıtan

 "Batys" óńirlik qolbasshylyǵynyń baspasóz qyzmeti