22 mamyr kúni Almaty qalasy, İle aýdany, Yntymaq aýylynda Qazaqstan Respýblıkasy men Ońtústik Koreıa memleketteri birlesip ashqaly otyrǵan «Sedjon Eýrazıa» atty klınıkanyń alǵashqy irgetasyn qalaý saltanaty ótti. Atalmysh jobanyń kelisimshartyna eki el arasynda 2011 jyldyń 26 tamyzda qol qoıylǵan. Saltanatty rásimge Almaty oblysynyń densaýlyq saqtaý basqarmasynyń basshysy Maralbek Meıirbekov, Koreıa Respýblıkasynyń QR-daǵy bas konsýly Hen Yn, Koreıanyń densaýlyq saqtaý ındýstrıasyn damytý ınstıtýtynyń prezıdenti Ko Ken Hva, Kengı-do provınsıasynyń densaýlyq saqtaý salasyn damytý bóliminiń jetekshisi Rú Ón Gol, Sedjon gospıtaliniń tóraǵasy Pak En Gvan, Sedjon gospıtaliniń prezıdenti Chon Ran Hı, «Sedjon Eýrazıa» halyqaralyq medısınalyq ortalyǵynyń bas dırektory Vácheslav Shegaı qatysty.
V.Shegaıdyń aıtýy boıynsha klınıkany qazaqstandyq qurylys mekemesi salady. Ortalyq quramyna polıklınıka, dıagnostıkalyq ortalyq jáne 100 kereýetke arnalǵan stasıonar kiredi. Emhanada shamamen 300-400-deı qyzmetker jumys isteıdi. Polıklınıkada kúnige 1000-nan astam adamdy qaraý kózdelip otyr. Sonymen qatar qazaqstandyq 20 dárigerdi Koreıada oqytý josparlanýda. Klınıka 2015 jyldyń 2-shi jartysynda iske qosylady.
– Qazaqstanda júrek aýrýlary 2-shi orynda. Aýrýhana múddesi – adamnyń aýrýynyń aldyn alý, Koreıadan beriletin medısınalyq kómek pen jańa tehnologıalar arqyly aýrýdyń belgileri men túrin tabý, asqynýdan saqtaý bolyp tabylady. Mysaly, rak aýrýynyń 1-shi kezeńin emdeýge 150 myń tg jumsalatyn bolsa, onyń 3-4 kezeńin toıtarýǵa 20-30 mln tg qarjy ketedi. Sol sekildi emhana mamandarynyń maqsaty – aýrýdy tez anyqtap,oǵan tıisti shara qoldaný bolmaq.Sonymen qatar memlekettik kvota men qaıyrymdylyq qoryn uıymdastyrý josparda bar,– deıdi Vácheslav Shegaı.
Bas konsýl Hen Yn:
–«Sedjon» aýrýhanasynyń kómegimen kóptegen adam ómirin saqtap qalatynymyzǵa senimdimin. Jobany júzege asyrýdaǵy maqsatymyz- densaýlyqty saqtap, ǵylymı zertteýlermen almasý. Qazaqstan damyǵan el. Koreıadaǵy «Sedjon» aýrýhanasy 30 jyldan beri júrek aýrýlaryn emdeýde úlken jetistikterge jetti. Qazaqstanda 2015 jyly halyqaralyq klınıka ashylǵanda jańa álemdik dárejege ıe bolady dep senemin,– deıdi.
Maralbek Meıirbekov:
– Elimizde medısına qarqyndy damýda.Osydan 4-5 jyl buryn kóptegen aýrýlardy emdeýge qaýqarymyz jetpegen bolsa, qazir onyń kóbin óz elimizde emdeý múmkin boldy. Al Qazaqstan men Koreıa arasyndaǵy bul joba eki elge de jemisin beredi dep oılaımyn, – dedi.
Jańa klınıkanyń salynýy turǵyndardyń Koreıa Respýblıkasynyń joǵary tehnologıaly medısınalyq ındýstrıasyna qol jetkizýin qamtamasyz etedi. Koreıanyń basqarý tájirıbesin qoldaný, klınıka qyzmetine Koreıanyń keńesshileri men bilikti mamandaryn tartý qazirgi ýaqytta sol eldiń aýrýhanalarynda emdelýdi qalaıtyn sheteldiń medısınalyq týrıser aǵynyn Qazaqstanǵa burýǵa zor múmkindik beredi.
Aıjanat Qazıeva
