Taraz qalasyndaǵy M.H. Dýlatı atyndaǵy Taraz memlekettik ýnıversıtetiniń M. F. Úrkimbaev atyndaǵy Jastar saraıynda "TÚRKSOI" jastar kameralyq orkestriniń konserti ótti dep jazady Qamshy.kz aqparat agenttigi.
Túrki keńesiniń 10 jyldyǵyna arnalǵan TÚRKSOI Jastar kameralyq orkestriniń konserttik týrnesi Túrkistan qalasynan bastalǵan bolatyn. Konserttik baǵdarlama Qazaqstannyń Túrkistan, Shymkent, Taraz, Almaty qalalarynda, Qyrǵyzstannyń Bishkek jáne Ázerbaıjannyń Baký qalalarynda jalǵasatyn bolady.
Búginge deıin quramynda 10 eldiń 100-den astam talantty jastary óner kórsetken orkestrge bul joly Tatarstannan Renat Salavatov, Qazaqstannan Anvar Akbarov, Ázerbaıjannan Mustafa Mehmendarov dırıjerlik etti.
"TÚRKSOI" halyqaralyq uıymy 1993 jyly túrki tildes halyqtar arasyndaǵy ortaq tarıhy men mádenıeti bar rýhanı baılanystardy qalpyna keltirý maqsatynda quryldy. Uıymnyń qamqorlyǵymen Halyqaralyq kameralyq orkestr, jastar kameralyq hory, halyq aspaptar orkestri quryldy jáne álem boıynsha gastrólde óner kórsetedi.
"TÚRKSOI" halyqaralyq jastar kameralyq orkestri TÚRKSOI Bas hatshysy Dúısen Qaseıinov myrzanyń bastamasymen 2010 jyly quryldy. Atalǵan mýzykalyq ujymdy qurýdyń maqsaty – atalǵan uıymǵa kiretin Túrki álemi mýzykanttarynyń birlestigi jáne túrki tildes elder kompozıtorlarynyń mýzykasyn nasıhattaý.
– Bul orkestr - mádenı qundylyqtarymyzǵa negizdelgen maqsatty jumysymyzdyń kózge kóringen naqty nátıjesi. «TÚRKSOI» jastar kameralyq orkestriniń Ortalyq Azıaǵa alǵash ret týrnege shyǵyp otyr. Orkestrimiz qurylǵan kúnnen bul kúnge deıin álemniń túkpir-túkpirinde konsertter berdi. Alaıda óz aımaǵymyzda osyndaı iri týrne uıymdastyrmap edik. Bul týrne - biz úshin týǵan aımaǵymyzdaǵy alǵashqy týrymyz bolady, - dedi halyqaralyq túrki mádenıeti uıymynyń bas hatshysy Dúısen Qaseıinov.
Orkestr mýzykanttarynyń quramynda Ázirbaıjan, Qazaqstan, Qyrǵyzstan, Túrkmenstan, Túrkıa, Reseı Federasıasynan – Bashqurtstan Respýblıkasy jáne Tatarstan Respýblıkasynyń azamattary bar. Ujym repertýarynda - álemdik klasıkanyń shyǵarmalary jáne túrki tildes elder kompozıtorlarynyń shyǵarmalary oryndaldy.
Halyqaralyq «TÚRKSOI» uıymynyń júzege asyrǵan konserttik týrnelerinde álemdik deńgeıdegi sahna sańlaqtarymen birge óner kórsetip, tájirıbe jınaǵan jas talanttar tyńdaýshylaryn túrki álemi mýzykasynyń sıqyrly sazyna saıahat jasaýǵa shaqyrady.
Jastar kameralyq orkestri kóptegen elderde mýzyka óneriniń tabynýshylaryn qýantatyn tabysty halyqaralyq ujym bolyp tabylady.
