Qýat ÁÝESBAI, «Túrkistan» halyqaralyq gazetiniń bas redaktory:

- Memleket basshysy Q.Toqaevtyń alǵashqy Joldaýynan qazaq jýrnalısıkasynyń qazyǵy qaǵylǵan Almatydaǵy qalamger qaýym jyly qabyl aldy. Joldaý jarıalanǵannan kóp ótpeı «Túrkistan» gazetiniń janyndaǵy «Aldaspan» pikirsaıys alańynda bir top almatylyq jýrnalısiń basyn qosyp, Joldaýda mán berilgen basym baǵyttardy talqyǵa salyp, oı eleginen ótkizdik. Jıynǵa qatysýshylardy Joldaýda áleýmettik máselelerge kóp basymdyq berilip otyrǵany erekshe qýantty. Prezıdenttiń saılaýaldy baǵdarlamasynda da bul máselelerge erekshe toqtalǵan bolatyn. Jalpy aıtqanda, halyqtyń kókeıinde júrgen, alań týdyrǵan túıitkilderdi Memleket basshysy dóp basyp, olardyń aldaǵy ýaqytta mindetti túrde óz sheshimin tabatynyna ýáde etti. El senimin nyqtaı túsý úshin jyl sońynda atqarylǵan isterdiń qorytyndy esebi bolar dep úmittenemiz.

Prezıdenttiń «Qazaq halqynyń memleket quraýshy ult retindegi rólin bekemdep, etnosaralyq tatýlyq pen dinaralyq túsinistikti qalyptastyra berýimiz qajet» degen sózi kóp kókeıinen shyǵýda. Sondaı-aq, «qazaq tiliniń memlekettik til retindegi róli kúsheıip, ultaralyq qatynas tiline aınalatyn kezeńi keledi» deı kele, tek mundaı názik máselede dańǵaza jasamaı, jumyla jumys isteýimiz kerek ekenin eskertti. Sol sıaqty jerimizdiń sheteldikterge eshqashan satylmaıtyny týraly pikiri de kópten beri eldi eleńdetip qoıǵan máselege núkte qoıǵandaı boldy.