Búgin Elordada Azıa qalamgerleriniń birinshi forýmy bastaldy. Oǵan qyryqqa jýyq elden qalamgerler qatysýda. Azıa qalamgerleriniń İ forýmynda Qazaqstan Respýblıkasynyń Prezıdenti Qasym-Jomart Toqaev sóz sóıledi. Ol óz sózinde Azıa forýmy qalamgerlerdiń ortaq dıalog alańyna aınalý qajettigin aıtty. 

–Azıa ádebıetin odan ári damytý úshin biz mynadaı mańyzdy máselelerge nazar aýdarýymyz qajet.
Aldymen, Azıa qalamgerleri forýmy shyǵarmashyl qaýymnyń mańyzdy dıalog alańyna aınalýy kerek.
Bul mańyzdy shara Azıa elderinde turaqty túrde ótýi qajet dep sanaımyn.
Adamzatty tolǵandyrǵan kúrdeli máseleler dál osyndaı alańdarda ortaǵa salynýy tıis.
Azıany búkilálemdik rýhanı damý ortalyǵy retinde damytý aıryqsha mańyzdy.
Sondyqtan ádebı úderisterdi jańǵyrtý úshin jaǵdaı jasaý – basty mindetterdiń biri.
Osy maqsatta «Azıa alyby» halyqaralyq ádebı syılyǵyn taǵaıyndaǵan jón.
Álemdegi áıgili syılyqtar sekildi bul marapattyń da bedelin arttyrýǵa kúsh salýymyz kerek.
Azıa qalamgerleri týyndylarynyń birtutas elektrondy kitaphanasyn quratyn ýaqyt jetti.
Bul Azıanyń teńdessiz dúnıetanymy jınaqtalǵan baǵa jetpes asyl qazynanyń esigin jer júzine aıqara ashatyn qundy dúnıe bolary sózsiz.
Osyndaı ıgi bastamalardy iske asyrý jumysy qalamgerlerimizdi biriktirip, Azıa ádebıetin jańa beleske shyǵarady dep senemin, –dedi Prezıdent Qasym-Jomart Toqaev forýmynyń ashylý saltanatynda sóılegen sózinde.