«Nur Otan» partıasy Sarysý aýdandyq fılıalyna qarasty «Qarataý» bastaýysh partıa uıymynda partıa Jambyl oblystyq fılıaly qoǵamdyq qabyldaý bóliminiń meńgerýshisi Úmit Ibraıymova «Halyqqa kómek» partıalyq jobasy aıasynda kóshpeli qoǵamdyq qabyldaý ótkizdi dep jazady Qamshy.kz aqparat agenttigi. 

Kóshpeli qoǵamdyq qabyldaýǵa partıa belsendileri men tıisti mekeme basshylary qatysty. Qabyldaý barysynda Saýdakent aýylynyń turǵyny Gúlbarshyn Táýekelova qazirgi kezde "Qazposhta" AQ-nyń aýdandyq bólimshesinde jumys isteıtindigin, degenmende mamandyǵy boıynsha jumys atqarǵysy keletindigin jetkizdi. Ótinish ıesine aýdandyq Halyqty jumyspen qamtý ortalyǵy dırektorynyń orynbasary Baqytkúl Beısenbekova Nátıjeli jumyspen qamtýdy jáne jappaı kásipkerlikti damytýdyń 2017 – 2021 jyldarǵa arnalǵan "Eńbek" memlekettik baǵdarlamasy aıasynda jumysqa turý múmkindikteri týraly keńinen túsindirý jumysyn júrgizdi.

Jańatas qalasynyń turǵyny Aıjan Úsenova turmystyq jaǵdaıyna baılanysty qysqy qajetti otyn-sý alýǵa múmkindigi bolmaı otyrǵanyn jetkizip, kómek berýdi surady. Atalǵan másele boıynsha qala ákiminiń mindetin atqarýshy Talǵat Tólebaev qyrkúıek aıynyń sońyna deıin ótinish ıesine qajetti kómek beriletindigin jetkizdi.

Kelesi qala turǵyny Aıjan Mahambetova óziniń kóp bala ana ekendigin, mektep jasyndaǵy balalaryna oqýǵa qajetti kıim-keshek alýǵa kómek surady. Ótinish ıesine partıa aýdandyq fılıaly tarapynan tıisti kómek kórsetildi.

Qala turǵyny Lázzat Kómekovada mektep jasyndaǵy qyzyna oqýǵa qajetti quraldar alýǵa kómek surady. Ótinish bildirýshige partıa aýdandyq fılıaly tarapynan qajetti kómek berildi.

Qala turǵyny Aısha Jańbyrbaeva turmystyq jaǵdaıyna baılanysty mektep jasyndaǵy balasyna oqýǵa qajetti qural-jabdyqtar alýǵa múmkindigi bolmaǵanyn jetkizip, kómek berýdi surady. Bul ótinish ıesine partıanyń oblystyq máslıhattaǵy depýtattyq fraksıasynyń múshesi, "Qarataý" taý-ken óńdeý kesheniniń dırektory Muratqalı Sársenov óz kómegin kórsetti.

Kelesi qala turǵyny Nursultan Ermek jaqynda joǵarǵy oqý ornyn bitirip kelgendigin, qazirgi kezde jumyssyz ekendigin jetkizip, jumysqa turýǵa kómek berýdi surady. Ótinish ıesine aýdandyq Halyqty jumyspen qamtý ortalyǵy dırektorynyń orynbasary Baqytkúl Beısenbekova Nátıjeli jumyspen qamtýdy jáne jappaı kásipkerlikti damytýdyń 2017 – 2021 jyldarǵa arnalǵan "Eńbek" memlekettik baǵdarlamasy aıasynda jumysqa turý múmkindikteri týraly túsindirdi. Qoǵamdyq qabyldaýdy qorytyndylaǵan Úmit Serikqyzy aldaǵy ýaqyttada osyndaı kóshpeli qabyldaýlar bolatyndyǵyn jetkizdi.