Qanat Tósekbaev Almaty qalalyq qoǵamdyq densaýlyq saqtaý basqarmasynyń basshysy qyzmetinen ketti, – dep jazady Qamshy.kz aqparat agenttigi. Bul týraly basqarmanyń feısbýktaǵy paraqshasynda habarlandy.

Qanat Tósekbaev qalalyq densaýlyq basqarmasynyń basshylyǵyna 2018 jyly kelgen. Onyń basshylyǵy tusynda densaýlyq saqtaý salasynda kóptegen jobalar engizildi. Ol jobalar medısınalyq mekemelerdiń básekege qabilettiligin arttyrýǵa, mańyzdy máselelerdiń sheshimin tabýda qoǵamdyq pikirdi jumyldyrýǵa baǵyttaldy.

Solardyń biri retinde 2019 jyldan bastap densaýlyq saqtaý basqarmasy profılaktıkalyq jumystardy kúsheıtý maqsatynda qoǵamdyq densaýlyq basqarmasy bolyp ózgertilgenin aıtýǵa bolady. Sonyń aıasynda polıklınıkalarda ınfeksıalyq jáne ınfeksıalyq emes syrqattar profılaktıkasyna baǵyttalǵan mektepterdi damytý qyzmetin keńeıtý kózdelgen.

Búginde óskeleń urpaqty óz densaýlyǵyna jaýapkershilikpen qaraýǵa úıretetin jastar ortalyǵy belsendi jumys isteýde. Osy oraıda memlekettik medısınalyq mekemelerde korporatıvtik menedjmentti engizý mańyzdy qadamdardyń biri bolyp sanalady. Ol úshin táýelsiz sarapshylardan turatyn jańa baqylaý keńesteri jumys isteýde.