Táýelsiz jýrnalıs Janbolat Mamaı  "Stalın qylmystary: ult zıalylaryn qalaı qyrdy" atty derekti fılm túsirdi, dep jazady Qamshy.kz aqparat agenttigi. Bul týraly Mamaı óziniń Facebook paraqshasynda jazdy. 

Mamaıdyń jazýynsha, atalǵan derekti fılmde HH ǵasyrdyń 20-30 jyldary qazirgi Qazaqstanda jerinde bolǵan jappaı qýǵyn-súrgin jyldary týraly baıandalady.

"Birneshe aı buryn ulttyq tarıhymyzdyń eń qaterli kezeńderiniń biri — ótken ǵasyrdyń 20-30-jyldaryndaǵy jappaı saıası qýǵyn-súrgin jaıynda jańa derekti fılm daıyndap jatqanymyzdy jarıalap edik. Biz elimizdegi barlyq tarıhı jerlerdi araladyq: birneshe myń qýǵyn-súrgin qurbany jerlengen Jańalyq aýylyna, ALJIR men KARLAGqa bardyq. Elimizdiń belgili tarıhshylarymen, sarapshylarymen kezdesip, suhbat jazdyq. Bul taqyrypqa qatysty kóptegen qujattarmen jumys jasap, esepsiz materıaldardy oqyp shyqtyq. Qyrýar jumysty atqaryp bolǵan soń, resmı túrde jarıalaımyn: Qazaqstandaǵy saıası repressıalarǵa qatysty derekti fılm DAIYN!

Fılm ataýy: «Stalın qylmystary: ult zıalylaryn qalaı qyrdy». Derekti joba eki tilde — qazaq jáne orys tilderinde daıyndaldy. Bul qur aýdarma emes, eki tildegi eki bólek fılm deýge bolady!

Rasynda da, bizdiń qoǵam stalındik zamannyń úreıimen áli de ómir súrýde, al jazalaý organdary «NKVD» túsinikteri men kategorıalarynan áli de aıyqqan joq. Biz ózimizdiń boıymyzdan NKVD-ny, Stalın men dıktatýrany alastamaǵan elmiz. Búgingi problemalarymyzdyń tamyryn, bálkim, sol kezeńderden izdeýimiz kerek te shyǵar. Derekti fılmde biz kóptegen tarıhı oqıǵalar jaıynda sóz qozǵaımyz. Tipti sol kezdegi tarıhı epızodtardy akterlardyń oıyny arqyly tiriltemiz. Bul jaı ǵana derekti fılm emes, akterlik oıyny bar derekti fılm bolyp shyqty. Sondyqtan bul joba kórermenderdiń barlyq tobyna da qyzyqty bolady dep úmittenemin.

Derekti fılmniń tusaýkeser kórsetilimin ótkizetin jerdi uzaq izdedik. Ókinishke qaraı, buryn «Zulmat» fılmi kórsetilgen «Arman» kınoortalyǵynda qazir kúrdeli jóndeý jumystary júrgizilýde. Biraq, belgili kınosynshy maman Oleg Boreskıdiń qoldaýymen biz «Sezar» kınoteatrymen kelisip, kórsetilimdi sol jerde jasaıtyn boldyq!

«Stalın qylmystary: ult zıalylaryn qalaı qyrdy» derekti fılminiń kórsetilimi «Sezar» kınoteatrynda (Nazarbaev kóshesi men Gogol kósheleriniń qıylysy), 25 qyrkúıek kúni, saǵat 19:00-de ótedi. Kirý tegin!

Kelińizder! Jańa derekti fılm týraly barlyq dostaryńyz ben týystaryńyzǵa aıtyńyz! Tarıhı ádildikti qalpyna keltirý isindegi bul da sizdiń úlesińiz!", - dep jazdy fılm avtory Janbolat Mamaı.

Janbolat Mamaı buǵan deıin HH ǵasyrda bolǵan asharshylyq jyldary týraly "Zulmat", qazaqtyń zıalylary qurǵan "Alash" partıasy týraly "Eger Alash Respýblıkasy jeńgende" atty derekti fılmder túsirgen.