Elimizde shaǵyn jáne orta kásipkerlikti damytý máselesi kún tártibinen túsken emes. Naryqtyq qatynastardyń alǵashqy kezeńinen osy salaǵa memleket tarapynan aıryqsha qamqorlyq ta jasalyp keledi. Oǵan Elbasy N.Nazarbaevtyń tikeleı tapsyrmalarynyń nátıjesinde ómirge kelgen baıandy baǵdarlamalar dálel. Memleket basshysy Q.Toqaev ta burynnan qalyptasqan strategıalyq maqsattardy sabaqtastyra otyryp, bıznestiń óristeýine kóńil bólýde. Prezıdent Qazaqstan halqyna alǵashqy Joldaýynda da osy salaǵa arnaıy basymdyq berdi. Bul árıne, negizsiz emes. Óıtkeni, kásipkerlik damysa jańa jumys oryndary ashylady, salyqtyq túsimder artady. Sol arqyly áleýmettiń áleýeti de kóteriledi.

Árıne, bıznes áleminde básekege qabilettiliktiń qatar júretini belgili. Kim elde joq kásippen aınalysady, sonyń saýdasy júredi. Sapaly ónim usynatyndardyń da tutynýshy kóp bolady. Bul turǵyda naryqty tereń taldap, marketıńke mán beretinder utady. Osy oraıda úndik baǵyp ta baıyp jatqandardyń tirligi kópke úlgi. Sala mamandary bul qus túrin baǵýdy aýyl sharýashylyǵynyń tabysty da tıimdi sektoryna jatqyzady. Olar az shyǵynmen kóp tabys tabýǵa bolatyn jobany saralaý barysynda osyndaı qorytyndyǵa kelip otyr.

Mine sondaı kásipkerdiń biri- Jambyl oblysynyń Baızaq aýdanyndaǵy «Merkýrıı» sharýa qojalyǵynyń jetekshsi Gúlnara Syzdyqova. Ol «Atameken Taraz» jaýapkershiligi shekteýli seriktestiginen alǵan 10 mıllıon teńge nesıe qarjysyna biraz jospar quryp úlgeripti. Oǵan aldymen úı qustarynyń qataryn kóbeıtý maqsatynda ınkýbator satyp alýdy kózdepti.

– Bul qus túrin durys tańdamasań da keıin ónim kórsetkishin tómendetip, bastaǵan isińniń berekesin ketirip jiberedi. Asyqpaı zertteı kele men eti dámdi ári tez ósetin «BIG-6» degen úndik túrin tańdadym. Bulardyń atalyǵy 25 kelige deıin salmaq tartsa, analyǵy 11 kelige deıin barady. Odan bólek odan shyǵatyn ónimniń taza salmaǵynyń 80-85 paıyzǵa deıin jetýi – rekordtyq kórsetkish. Tipti bul kórsetkishpen eshqandaı úı janýaryn salystyrýǵa kelmeıdi. Degenmen, úndiktiń bul túrin kóbeıtýde bir keleńsizdik bar. Ol – ózdiginen, ıaǵnı tabıǵı jolmen baıaý kóbeıetindigi. Sol sebepti qolmen jumyrtqa bastyryp, kóbirek balapan shyǵarmasań kásibińniń ónimdiligi túsip ketedi. Mine, biz osy maqsatta palata janyndaǵy qarjy uıymynan qomaqty nesıe alyp, ınkýbator jáne ózge de kerek-jaraqtardy satyp aldyq, – degen Gúlnara Syzdyqovanyń kásipkerlik palata ókilderine jáne seriktestik ujymyna aıtar alǵysy sheksiz.

Aıta ketý kerek, «Merkýrıı» sharýa qojalyǵy aldaǵy qazan aıynda 3 myńǵa jýyq tonna et alýǵa daıyndalyp otyr.