Súıinshi, aǵaıyn! Úndistan memleketinen aqjoltaı habar jetti. Qarshadaı qyzymyz Elızat Aıazbek Azıa chempıony atandy. Sambodan jalaýy jelbiregen dodada qarakózimiz qarsylastaryn qoǵasha japyryp, sary qurlyq tórinde Ánuranymyzdy shyrqatty dep jazady Qamshy.kz aqparat agenttigi. Elızat 2001 jyly Jambyl oblysy Talas aýdany Aqqum aýylynda dúnıege kelgen. Bala kezinen sportqa zerek ósken bolashaq chempıondy bilikti bapker Barbol Jáýish sportqa baýlı bastaıdy. Keıinnen Elızat Taraz qalasyndaǵy №7 balalar-jasóspirimder sport mektebine aýysyp, osynda sheberligin shyńdaı túsedi. Haırýlla Lýkmanovtyń tárbıesine kelgen qarakózimiz ústimizdegi jyly Aqtóbe qalasynda jasóspirimder arasynda ótken alamanda top jarady. Endi mine Úndistan memleketiniń Nú-Delı qalasynda túndigin túrgen baıraqty básekede aıy ońyna týyp, Azıa chempıony atanyp otyr.

Tarazdyq sportsúıer qaýym Úndistannyń Nú-Delı qalasynda sambodan ótken Azıa chempıonatynda altynnan alqa taqqan Elızat Aıazbekti zor qoshemetpen qarsy aldy. Bul kúni qarapaıym ǵana aýyldyń sport mektebinde jattyǵyp, sary qurlyq birinshiliginde jeńis tuǵyrynan kóringen Elızatqa jankúıerlerimen birge ózi bilim alatyn Erjan Ámirbekuly bastaǵan Taraz memlekettik pedagogıkalyq ýnıversıteti men №7 oblystyq balalar men jasóspirimder sport mektebiniń ujymy da qurmet kórsetti.

14 jasynan bastap Talas aýdanynyń Aqqum aýylynda jattyǵyp Azıa chempıony atanǵan arýdy sambonyń qyr-syryna Bostandyq balalar men jóspirimder sport mektebiniń jattyqtyrýshysy Barbol Jáýishov baýlyǵan.

–Elızattyń sportqa qarym-qabiletin bala kúninen baıqaǵam. Keıin ata-anasynan sambo úıirmesine qatysýyna ruqsat suradym. Alǵashynda anasy qarsy boldy. Keıinnen Elızattyń boıyndaǵy bula kúshtiń sportta jetistikke bastaıtyndyǵyna kóz jetkizdi. Ol mektepte oqyp júrip birneshe ret respýblıka birinshilikterinde top jardy, –deıdi B.Jáýishov.

Al Elızattyń ózi Úndistan jerindegi saıysta elde qalyp taqymyn qysqan ata-anasynyń, baýyrlarynyń jalpy jankúıerleriniń qoldaýyn sezgenin aıtady.

–Árıne Azıanyń 15 memleketinen chempıon atanýǵa úmitti eń myqty sportshylar kelgen saıysta qarsylastyń qaı-qaısysyda osal emes. Onyń ústine á degennen men sambo sportynan Azıada úzdik sanalatyn ózbek, qyrǵyz sportshylarymen beldestim. Maǵan úmit artqan elimniń qoldaýyna arqa súıip barlyq beldesýlerimde qarsylastarymnan basym tústim,–deıdi Elızat Aıazbek.

Aýyldan shyqqan Azıa chempıonynyń endigi muraty kelesi aıda Ózbekstanda álem chempıonatynda olja salý bolyp otyr. Ol bul endigi kezekte jattyǵý jumystaryn Taraz qalasyndaǵy №7 oblystyq balalar men

jasóspirimder sport mektebiniń jattyqtyrýshylarymen júrgizbek. Sondaı-aq bapkerleri Elızattyń óz baǵyn olımpıadalyq sport sanalatyn dzúdoda synap kórýge nıetti ekendigin atap ótti.

Memleket maqtanyshyn tolaıym tabysymen shyn júrekten quttyqtaımyz! Alar asýyń bıik bolsyn, Elızat!