Qazaqstanda araq óndirisi azaıyp, syra men shylymǵa suranys joǵarylaı túsken, dep habarlaıdy Qamshy.kz aqparat agenttigi 365info.kz saıtyndaǵy derekti negizge alyp.

Statısıka komıtetiniń málimetinshe, qańtar-tamyz aralyǵynda Qazaqstanda 12,5 mln lıtr araq óndirilgen. Bul byltyrǵy sáıkes kezeńmen salystyrǵanda anaǵurlym (38%) az. Ótken jylǵy 8 aıda óndiris kólemi 20 mln lıtrdan asyp ketken bolatyn.

Óndiris dınamıkasynyń tómendeýi birneshe jyldan beri baıqalyp otyr. 2013 jyly ortasha aılyq óndiris 3,8 mln lıtrdy qurasa, 2016 jyly 2,9 mln-ǵa deıin tústi. 2018 jyly tipti 2,5 mln-dy qurady. Qazir kórsetkish aıyna 1,5 mln lıtrǵa deıin kemigen.

Araq óndirisimen qatar ımporttyń da tómendegeni baıqalady. Jyl basynan bergi 7 aıda Qazaqstanǵa 3,9 mln lıtr araq ákelinipti. Byltyr bul kezeńde 4,8 mln lıtr ónim jetkizilgen-di.

Konák ónimderine de suranys tómendeı túsken. 2018 jylǵy kórsetkishpen salystyrǵanda ımport 40 paıyzǵa (1,5 mln-nan 0,9 mln-ǵa deıin) azaıǵan. İshki naryqtaǵy óndiris te 14 paıyzǵa túsipti.

Araq pen konákqa degen suranystyń tómendigi spırt qoldanysyn azaıtýda. Jyl basynan beri 8 aıda 790,8 myń lıtr etıl spırti óndirilgen. Byltyrǵy sandar budan 32 paıyzǵa kóp bolatyn.

Qalyptasqan jaǵdaı vıno óndirisine de tán.

Esesine syra óndirisi joǵary qarqynǵa ıe. 7 aıda Qazaqstanda 429,4 mln lıtr kóbikti sýsyn óndirilgen. Bul Qazaqstandaǵy ár adamǵa, onyń ishinde balalar da bar, 23 lıtrdan aınalady eken. Byltyrǵy uqsas kezeńmen salystyrǵanda satylym 1,9 paıyzǵa ósken.

Qazaqstandyq óndirýshiler suranystyń 91 paıyzyn qamtamasyz etedi.

Syradan bólek tabak ónimderine de suranys artyp keledi. 8 aıda 9,7 mlrd shylym men ózge de tabaktyq ónim óndirilipti. Bul ótken jylǵy kórsetkishten kem bolǵanymen, suranystyń qalǵan bóligin ımporttyq taýarlar japqan.