Sybaılas jemqorlyq-memlekettiń damýyna keri áserin tıgizetin faktordyń biri. Sondyqtan da oǵan qarsy is-qımyl sharalary bir sátke de tolastamaıdy. Prezıdent Q.Toqaev Qazaqstan halqyna Joldaýynda da bul máselege aıryqsha kóńil bólim, qazyna qarjysyna qol salǵandardyń jazasyz qalmaıtyndyǵyn qatań eskertti. Osy oraıda Jambyl oblysynda da keshendi sharalar júzege asýda. Mysaly, jaqynda Jýaly aýdany ákimi apparatynyń májilis zalynda aýdandaǵy sybaılas jemqorlyqqa qarsy kúres komısıasynyń úshinshi toqsandaǵy keńeıtilgen otyrysy bolyp ótti.

Jıynǵa QR Sybaılas jemqorlyqqa qarsy is qımyl agenttiginiń oblys boıynsha departamenti basshysynyń birinshi orynbasary Ravıl Tólebaev, atalǵan departament qyzmetiniń tergeýshisi Batyrjan Shamgýnov pen aýdan ákimdiginiń bólim basshylary, aýyldyq okrýg ákimderi qatysty.

Otyrys barysynda qylmystyq quqyq buzýshylyqtar jáne basqa da zań buzýshylyqtar jasaýǵa yqpal etken mán jaılardy joıý jóninde jáne aýdandaǵy sybaılas jemqorlyqtyń oryn alǵan kórinisi týraly Batyrjan Shamgýnov baıandady. Ol atalmysh aýdandaǵy balabaqshanyń múlikterin jymqyrǵan tulǵalardyń isi boıynsha jasalǵan jumystardy tilge tıek etti.

Budan soń aǵymdaǵy jyly aýdanda sybaılas jemqorlyqqa qarsy kúres boıynsha atqarylǵan sharalary jóninde aýdandyq bilim bóliminiń basshysy Májıt Aıjanovtyń habarlamasy tyńdaldy. Májıt Mamytuly Jýaly aýdany ákimdiginiń bilim bólimi men bilim mekemelerinde Qazaqstan Respýblıkasynyń 2015-2025 jyldarǵa arnalǵan sybaılas jemqorlyqqa qarsy strategıasynyń iske asyrýǵa arnalǵan is-sharalar jospary jasalynǵanyn, josparda naqty belgilengen sharalardyń oryndalý merzimderi men jaýapty qyzmetkerler bekitilgenin atap ótti.

Jıyndy qorytyndylaǵan QR Sybaılas jemqorlyqqa qarsy is qımyl agenttiginiń oblys boıynsha departamenti basshysynyń birinshi orynbasary Ravıl Tólebaev aýyldyq okrýg ákimderine sybaılastyq quqyq buzýshylyqqa ákeletin kórinisterdiń oryn alýynyń aldyn alý boıynsha tıisti jumystar jasaý kerektigin atap ótti. Sonymen birge aýyldyq okrýg basshylarynyń qyzmetine saı áreket etip qana qoımaı, júris-turysyna da zor mán berýi kerektigin tilge tıek etti.

– Aýyldyq okrýg ákimderi sol jergilikti halyqtyń aldynda eń úlgili tulǵa bolýy tıis. Onyń aıtqany tyńdalýy kerek ári der kezinde oryndalýy kerek. Tipti halyqtyń aldynda sóılegen sózi men kıimine de erekshe mán berýi tıis. Bir kezderi fýtbolkamen júrip el basqarǵandardyń isin tártiptik keńeste qaraǵan bolatynbyz. Halyqpen tike jumys jasaıtyndyqtan halyqtyń narazylyǵy ıa memleketke degen senimdiligi sizder arqyly keledi, – dedi Ravıl Qýanyshuly.