Aǵymdaǵy jyldyń basyndaǵy málimet boıynsha Jambyl oblysy turǵyndarynyń jalpy sany 1 mıllıon 125 myń 442 adamdy quraıdy. Al oblystyń 1 mıllıonynshy turǵyny osydan 14 jyl buryn T.Rysqulov aýdanynda dúnıe esigin ashqan, dep jazady Qamshy.kz aqparat agenttigi. 

T.Rysqulov aýdanynda turatyn Nurbol Tústikbaev pen Sholpan Qurmanbekova alǵashynda 2005 jyldyń 23 qyrkúıeginde dúnıe esigin ashqan uldary Danıar Ásemquldyń mıllıonynshy jambyldyq ekeninen beıhabar bolǵan.

–2005 jyldyń 23 qyrkúıeginde Danıardy dúnıege ákeldim. Alaıda ol kezde Jambyl oblysynyń mıllıonynshy turǵynynyń anasy atanǵanymdy bilgen joq edim. Tek úsh aıdan soń Turar Rysqulov aýdandyq ákimdiginiń qyzmetkerleri kelip maǵan bul habardy súıinshiletip jetkizdi. Jańa jyl qarsańynda oblys ákiminiń arnaıy quttyqtaýǵa keletinin estigende qýanyshymda shek bolmady. Bulaı bolady degen oı úsh uıyqtasam túsime de kirmegen shyǵar. Shynymen mereke qarsańynda oblys ákiminiń orynbasary óńir basshysynyń arnaıy quttyqtaýyn jetkizip, Taraz qalasynan úsh bólmeli páterdiń kilti men 1 mıllıon teńge kóleminde arnaıy syılyqty tabys etti,– mıllıonynshy jambyldyqtyń anasy Sholpan Qurmanbekova.

Qazir Danıar otbasymen birge Taraz qalasynda turady. Aıtpaqshy Jambyl oblysynyń mıllıonshy turǵyny Nurbol Tústikbaev pen Sholpan Qurmanbekovanyń shańyraǵyndaǵy ekinshi perzent. Ol bilim alatyn Taraz qalasyndaǵy №53 mekteptiń pedagogıkalyq ujymy da Danıardyń oqýda ozat ekenin alǵa tartady.

Jalpy sońǵy 20 jylda Jambyl oblysynda demografıalyq dúmpý baıqalady. HHİ ǵasyrdyń alǵashqy jyly jambyldyqtardyń jalpy sany 986 144 adam bolǵan. Odan keıingi 3 jylda oblys halqynyń sany 979 199 adamǵa deıin azaıyp ketken. Buǵan táýelsizdiktiń alǵashqy jyldaryndaǵy kóptegen ult ókilderiniń tarıhı otanyna oralýy men jaıly turmys izdeý maqsatynda óris alǵan respýblıkadaǵy ishki mıgrasıanyń áser etkeni daýsyz. Bul faktorlar kúni búginge deıin oblys halqy sanynyń ósimine tejeý bolyp kele jatqany daýsyz. Oblys turǵyndary negizinen Nur-Sultan, Almaty, Aqtaý qalalaryna qonys aýdarady. Sol sekildi, jumyspen qamtýdyń jańa baǵdarlamasy esebinen soltústikke qonys aýdarýshylardyń sany da edáýir ulǵaıǵan.