Esepti jyl ishinde Jambyl oblysynda jalpy qurylys jumystarynyń kólemi 62,8 mıllıard teńgeni qurap, 2,5 paıyzǵa artty. Bul respýblıka óńirleri aralyǵyndaǵy aldyńǵy qatarly oryn dep jazady Qamshy.kz aqparat agenttigi. 

Jyl basynan 333,9 myń sharshy metr turǵyn úı paıdalanýǵa tapsyrylyp, kórsetkish 7,3%-ǵa ósti. 260 páter kópbalaly jáne az qamsyzdandyrylǵan otbasylaryna berildi.

Baspanaǵa muqtaj az qamtylǵan jáne kópbalaly otbasyn turǵyn úımen qamtamasyz etý maqsatynda oblysta josparlanǵan 12 jataqhananyń 8-niń qurylysy bastaldy.

Jalpy, turǵyn úı kezegindegi 2661 kóp balaly otbasynyń 924-i baspanamen qamtylady. Jeke turǵyn úı qurylysyna 2877 jer telimi beriledi. Budan bólek, tek elektr qýatyn tarta otyryp 3722 jer telimin berý qarastyrylýda. «7-20-25» baǵdarlamasy aıasynda 419 adam ótinish berip, 231-i qoldaý tapty. 207 azamatqa 1,4 mlrd. teńgege nesıe rásimdeldi. «Nurly jer» baǵdarlamasy aıasynda qaralǵan 17,6 mlrd. teńge esebinen (RB – 13,7 mlrd., OB - 3,9 mlrd) 30 kóppáterli turǵyn úıdiń qurylysy júrgizilýde (28 úı - 2019 jyly tapsyrylýy tıis, 2 arendalyq úı – 2020 jylǵa ótpeli). 38 ınjenerlik ınfraqurylym jobalarynyń qurylysy júrgizilip, 31 joba iske asyryldy. Nátıjesinde, 1673 páter paıdalanýǵa berilip, 4654 jer ýchaskelerine ınjenerlik-kommýnıkasıalyq ınfraqurylym tartyldy. Negizgi qaǵıdat – turǵyndar, ásirese, áleýmettik turǵydan álsiz toptar úshin baspananyń qoljetimdiligin arttyrý. Úkimet júıesiz baǵdarlamalar qabyldaý tájirıbesin toqtatyp, turǵyn úı saıasatyn jetildirýdiń biryńǵaı modelin ázirleýi qajet.

Máselen, bastapqyda áleýmettik múddege oraılastyrylǵan «7-20-25» baǵdarlamasy aıasynda qaryz alýshynyń otbasylyq tabysy ortasha eseppen aıyna 320 myń teńgeni quraýy tıis. Tabysy az adamdar buǵan qatysa almaı otyr.

Sondyqtan bıyl Elbasynyń bastamasy boıynsha 2 paıyzdyq jeńildetilgen mólsherlememen, paıyzdyq alǵashqy jarnasy 10 paıyz bolatyn jańa «Baqytty Otbasy» baǵdarlamasy iske qosyldy. Bul – óte tıimdi jeńildik.

Jyl sońyna deıin bul baǵdarlama boıynsha kem degende 6 myń otbasy baspanamen qamtamasyz etiledi. Birinshi kezekte, kópbalaly jáne múgedek balalar tárbıelep otyrǵan otbasylar qamtylatyn bolady. 2020 jyldan bastap jyl saıyn osyndaı 10 myń otbasy baspanaly bolady.