Jambyl oblysy Qazaqstan halqy Assambleıasynyń «Jańǵyrý joly» jastar qozǵalysynyń «Jastar jylyna» arnalǵan is-sharalar josparyna sáıkes oblystyń «Jańǵyrý joly» jastary respýblıkalyq «Eltaný» týrısik-ólketaný ekspedısıasy aıasynda Túrkistan oblysynyń tarıhtan syr sherter kóne jerlerine aralaýǵa baǵyttalǵan ekskýrsıanyń ekinshi bóliminde jastardy Túrkistan kútip turǵan edi dep jazady Qamshy.kz aqparat agenttigi. Ekskýrsıanyń ekinshi kúni Qoja Ahmet Iassaýı, Rabıǵa-Sultan Begim keseneleri, Qoja Ahmet Iassaýı kesenesiniń mańynan oryn tepken emdik qasıetke ıe shyǵys monshasy, Hılvet jer asty meshitine, Sháýildir aýylyndaǵy Arystan-Bab kesenesi (Q.A. Iassaýıdiń muǵalimi jáne rýhanı tálimgeri), Otyrar qalashyǵy (arheologıalyq qazbalar), Otyrar tarıhı-ólketaný murajaıyna saıahat jasaǵan jastar tarıhpen betpe-bet kelgendeı áser alǵandaryn jasyrmady.

Q.A.Iassaýı kesenesi XIV ǵasyrdyń sońynda turǵyzylǵan arhıtektýralyq ǵımarat. Qoja Ahmet Iassaýı dúnıe salǵannan keıin halyqtyń kóp jıylýymen ózine arnap soǵylǵan kishkene mazarǵa jerlenedi. Keıin bul kesene musylmandardyń jappaı táý etý ornyna aınalǵan. Mekeme qyzmetkerleri assambleıa jastaryna bassuqqan ár kıeli oryndy jiti tanystyrdy. Olar týraly kóptegen aqparattarmen bólisip, tarıh tunyǵynan sýsyndatty.

Saıahat barysynda shtabtyń belsendi múshesi Lıgostaev Artýr:

- «Qazaq dalasynyń ár tasyn túrtseń tarıhyn kóresiń. Bul men úshin óte qyzyqty sapar boldy. Sebebi, mundaı kórinister bizdi san ǵasyrlarǵa kóz júgirtedi. Al, ótkenimiz - tarıhymyz. Tarıhta bizdiń ata-babalarymyzdyń izi bar. Bul ekskýrsıa bizge tek kóńildi saıahat qana emes, tunyp turǵan rýhanıat. Men osynda kelgenime óte qýanyshtymyn jáne osy saıahatty uıymdastyrǵan oblystyq assambleıaǵa alǵysymdy aıtamyn. Aldaǵy ýaqytta jastarǵa osyndaı rýhanı, mádenı, tarıhı azyq syılaıtyn óńiraralyq «Ólketaný» týrlary kóp bolsa eken. Biz bir sát kúndelikti kúıbeń tirshilikten sergip, tarıhqa saıahat jasap qaıttyq.» - dep óz oıymen bólisti.

Sapar sońynda assambleıa jastary Túrkistannan «tábárik» retinde týystary men tanystaryna túrli sývenır-bazarlyqtar alyp, kıeli Túrkistan keseneleri mańynda sýretterge tústi.