«Adal júrek» jalpyrespýblıkalyq qaıyrymdylyq naýqany aıasynda «Jambyl-adaldyq alańy» jobasy sheńberinde 600 júzge jýyq quqyq qorǵaý organdary men memlekettik qyzmetshilerdiń qatysýymen salaýatty ómir súrý salty men meıirimdilikti jáne parasattylyqty nasıhattaý, áleýmettik kómekke muqtaj jandarǵa qoldaý kórsetý maqsatynda qaıyrymdylyq marafony ótti. Marafondy Jambyl oblysy ákiminiń birinshi orynbasary Bekbolat Orynbekov ashyp, qatysýshylarǵa sáttilik tiledi. Budan keıin Taraz qalasynyń Dostyq dańǵylynan bastap Tóle bı kóshesiniń boıymen Qazaqstan Respýblıkasynyń Tuńǵysh Prezıdenti saıabaǵyna deıin 2400 metr jerdi quqyq qorǵaý organdary men memlekettik qyzmetshiler júgirip ótti. Árbir qatysýshy marafonnyń bastalýy aldynda erikti túrde qaıyrymdylyq jarnasyn tólegenin de aıta ketken jón. Shara sońynda qatysýshylar men jeńimpazdardy uıymdastyrýshylar kýbok jáne dıplomdarmen marapattady. Al marafonǵa qatyspaǵandar oblystyq qan ortalyǵynda qan tapsyryp, qaıyrymdy is jasady.

Búgingi kúnge oblysta dene shynyqtyrý jáne sportpen júıeli túrde shuǵyldanýshylar qatary 333,9 myńnan astam adamǵa nemese 29,6 paıyzǵa jetti. Sonyń ishinde dene shynyqtyrý jáne sportpen júıeli túrde shuǵyldanatyn 14 jastan 29 jasqa deıingi jastar sany 147,4 myń adamdy qurap otyr. Sonymen qatar sportpen turaqty shuǵyldanatyn dene múmkindigi shekteýli adamdar qatary 2746 adam nemese 7,9 paıyzdy mejeleýde.

Qazirgi kezde óńirde oblystyń baı sporttyq dástúrin tabysty jolǵa qoıýǵa barynsha yqpal etip otyrǵan 48 sport mekemesi bar. Olardyń qatarynda, sport túrleri boıynsha 6 sport klýby, «Buqaralyq-sporttyq sharalar ótkizý ortalyǵy», «Joǵary sport sheberligi mektebi», «Olımpıada jetkinshekterin daıarlaý ortalyǵy», «Taraz-Arena» sport saraıy, «Oblystyq mamandandyrylǵan daryndy balalar mektep-ınternaty»,Talas aýdanyndaǵy «Dene shynyqtyrý-saýyqtyrý kesheni», Qordaı aýdanyndaǵy «Buqaralyq sporttyq is-sharalar ótkizý ortalyǵy» jáne 35 balalar-jasóspirimder sport mektepteri tur. Olardyń 30-y aýdan ákimdikteriniń quzyrynda.

Jalpy, oblystyń sport mekemelerinde sporttyń 43 túri qamtylǵan. Onyń ishinde 24 olımpıadalyq, 12 olımpıadalyq emes jáne 7 ulttyq sport túrleri.

Búgingikúnge oblysta sport nysandarynyń jalpy sany 2 364-ke jetse, onyń ishinde aýdandarda 1 856 sport nysany ornalasqan. Sport nysandarynyń 98 paıyzy halyqqa qoljetimdi. Jyl sońyna deıin qoljetimdilikti 100 paıyzǵa jetkizý kózdelip otyr.