Bir aı buryn QR Mádenıet jáne sport mınıstri Aqtoty Rahmetollaqyzynyń nazaryna hat jazdym. Kórmeı qalady deıtindeı emes, ol hatym «Qamshy» portalynda jarıalandy. Qazir qaǵazǵa ırektetip, hat jazyp, pochta arqyly joldap, jaýabyn aılap kútetin zaman emes qoı. BAQ-ta aıtylǵan, jazylǵan máselege sheneýnikter ertesi-aq jaýap berip (keıde baspasóz qyzmeti arqyly) jatqanyn kózimiz kórip júr. Óıtkeni qazirgi ýaqyt eki kún oılanyp, úsh kún tolǵanatyn kezeń emes. Bári de edel-jedel. Sol edel-jedel ýaqyttyń yrqymen men de Mádenıet jáne sport mınıstrine hat joldaǵan edim.

Sodan keıin ne boldy deısiz ǵoı, eshteme de bolǵan joq. Mádenıet mınıstriligi tym-tyrys. Eń bolmasa, hatty kórgenderin, men usynǵan másele boıynsha qandaı da bir pikirleri bar ekenin, qoshtap ne qoshtamaıtyndaryn aıtpady. Tipti shyǵarypsalma jaýap jazyp, tildeı pikir de jóneltpedi. Demek meniń sózimdi mınıstr qulaǵyna ilmedi. Bálkim jaýap berýge tatymaıdy dep sanaǵan shyǵar. Álde shekara asyp kelgen oralman bolǵanymdy olqy kórdi me eken?!

Men jazǵan hatymda ne aıtyp edim? Jeke basymnyń problemasyn jazdym ba? Árıne, joq. Ótken jylǵy Elbasymyz óz joldaýynda 2019 jyldy «Jastar jyly» dep jarıalaǵanyn jalpaq jurt biledi. Soǵan oraı, elimizde túrli bastamalar kóterilip, san túrli sharalar qolǵa alynyp jatyr. Meniń usynysym da osy máselemen oraılas edi. Qazaqtyń arqaly aqyny Maǵjan Jumabaevtyń «Jastarǵa» deıtin ǵalamat óleńin bilmeıtin qazaq joq búginde. Ǵasyr buryn Maǵjan aqyn «Men jastarǵa senemin» dep ketti. Ósetin el jastaryna úmitpen qaraıdy, senim artady. Sebebi jastar – eldiń bolashaǵy. Sol jastardyń ókili retinde «Men jastarǵa seneminge» án jazǵan edim. Tyńdarman bergen baǵa meni qýantty. Birqatar zıalylar batasyn berip, alǵysyn aıtty, naǵyz «Maǵjannyń marshy» eken desti.

Túsingen janǵa «Men jastarǵa senemin» – Maǵjannyń amanaty. Aqyn amanatynyń Alash jurtyna teń taraǵanynan eshkim zıan shekpeıdi. Alaıda ıdeologıanyń basty quraly sanalatyn telearnalarǵa jeńil-jelpi, jarqetpe ánder ótimdi keledi de, rýhty ánder, qazaqtyń qazaq ekenin tanytatyn ánder qajetsiz, olar bosaǵada qalady. Bul jóninde tańdy tańǵa soǵyp aıtýǵa bolady. Myń mysal, júz dálel keltirýge bolady. Biraq bul baǵytta áńgime órbitsem, taqyryptan aýytqyp ketetinim anyq. Sondyqtan negizgi máselege oralaıyn.

♦Aqtoty hanym, Siz jastarǵa senesiz be? (vıdeo)

Sol hatymda men mınıstr hanymǵa bylaı dedim: «...Qazaqy naqyshtyń ereksheligin qaltqysyz uǵynasyz, dala sazynyń sıqyryn salmaqtaı bilesiz. Ótinishim, «Men jastarǵa senemindi» bir tyńdap kórińiz! Unamasa, meniń osal bolǵanym. Onda shamama qaramaı, Maǵjannyń jyryna jarmasqanym úshin kóp aldynda keshirim suraýǵa da daıynmyn. Al eger... Eger talǵamyńyzdyń údesinen shyqsa, Maǵjannyń jyryn jańǵyrtyp, búgingi qoǵamǵa «ótkize almaı» júrgen otyzdaǵy oralman qazaqtyń muńyn túısinetin shyǵarsyz...».

Osy jerde myna máseleni de aıtpaı ketýge bolmas. Bálkim, bázbireýler «E, bul bala ánin nasıhattaı almaı júr eken ǵoı» degen tárizdi oı túıýi de múmkin. Shúkir dep aıtaıyn, qazirge deıin jıyrmaǵa jýyq ánim jaryq kórse, sonyń denin kópshilik jyly qabyldady. «Kók týdyń jelbiregeni» áni arqyly tanylǵan Ibragım Eskendir eki ánimdi oryndap júr. Erkin Shúkimanov aǵam bir ánimdi qabyl aldy. Jalpy, men nasıhatta zárý jan emespin, maǵan keregi – Maǵjan amanatynyń Alashqa jańǵyryp jetkeni. Jastardyń júregine ornyqqany. Bul jalǵyz meniń emes, Mádenıet mınıstrliginiń de kókeıindegi sharýa bolýy tıis edi ǵoı. Ulttyq naqyshy, rýhty boıaýy bar dúnıelerdiń parqyn telearnalar túsinbese de, Mádenıet mınıstri uǵynatyn shyǵar degen úmitimniń bolǵanyn jasyrmaımyn.

Endi sońǵy másele: mınıstr nege estimegen boldy? Unatpady ma? Meniń usynysym qolaıyna jaqpady ma? Álde ánim talǵamyna tatymady ma? Endeshe nege aıtpaıdy? Álde meniń Qazaqstan azamaty retinde, jas býynnyń ókili retinde mınıstrge saýal qoıýǵa qaqym joq pa? Jeke bastyń máselesi emes, Alashtyń aqynyna, onyń jastarǵa rýh berer óleńine án jazǵanyma aıyptymyn ba? Álde mınıstr Alash máselesine atústi qaraı ma?
Bul suraqtarǵa endi mınıstr birdeme deıtin shyǵar dep otyrmyn.

Erlan Tóleýbaıdyń feısbýk paraqshasynan alynǵan