Semeıde Shyǵys Qazaqstan oblystyq Ámire Qashaýbaev atyndaǵy memlekettik fılarmonıanyń 74 maýsymashar konserti ótti. Ónerdiń qarashańyraǵy sanalatyn ujymnyń irgetasy qurylǵannan bastap ónerpazdar alys-jaqyn shetelderdi tánti etip keledi. Al, bıylǵy maýsymashar "Rýhanı jańǵyrý", "Jastar jyly" jáne Abaı Qunanbaıulynyń 175 jyldyǵyna oraı uıymdastyrylyp, qalyń kórermenge usynyldy. Árdaıym tyń jańalyqtarymen kórermendi tańǵaldyryp júrgen ujym birneshe elderde gastróllik saparmen bolǵan.

– Búgin aıtýly kún. Barshamyzǵa ortaq mereke. Óıtkeni, úlken ujymnyń kórermen aldynda synalýy, ónerlerin kórsetýi ońaı emes. Birneshe aıdyń daıyndyǵyn bir demde halyqqa usyný bizdiń basty maqsatymyz. Fılarmonıanyń osy ýaqytqa deıin jetken jetistikteri óte kóp. Olardyń jyl saıyn shyńdalyp, ónerdiń bıigine umtylýlaryna da kóp múmkindikter jasalyp jatyr. Bıyl ujym jańa ónerpazdarmen tolyqty. Olar joǵary bilimdi, bilikti mamandar. Mine, osyndaı qarqynmen jumys atqarsaq, biz baǵyndyrar belestiń áli alda ekenin zor senimmen aıtamyn,  – dedi fılarmonıa dırektory Adaı Azamatov.

Konserttik baǵdarlama taqyrypqa saı teatrlyq qoıylymmen jáne ánshilerdiń "Toıbastar"  ánimen bastaldy. "Bıbigúl" qazaq halyq aspaptary orkestriniń oryndaǵan kúmbirlegen kúıine, "Tumar" bı ansambliniń myń buralǵan bıshileriniń bıine, joǵary deńgeıde óner kórsetken ánshilerdiń ónerine qol soqpaǵan jan qalmady. Konserttiń joǵary dárejede ótýine, uıymdastyrylýyna muryndyq bolyp, rejıserlyq qyrymen tanylǵan – ánshi, kompozıtor Gúldana Noǵaıbaeva.

Aıta keteıik, ujym qarasha aıynyń aıaǵynda Mońǵolıa eline jumys saparmen barmaq. Al, jyldyń sońyna qaraı fılarmonıanyń fólklorlyq ansambli Maıamı qalasyna baryp, óner kórsetpek.

Semeı qalasynyń aqparattyq ortalyǵy