Qazaq tiline qatysty máselelerdi baıyppen sheshken jón. Bul týraly «Qazaqstan» telearnasynyń «Kózqaras» baǵdarlamasyna suhbat bergen QR Aqparat jáne qoǵamdyq damý mınıstri Dáýren Abaev aıtty.

– Bul másele týraly men de bilemin. Árıne, jýrnalıserdiń qoıyp otyrǵan talaby óte oryndy. Bárimiz de bilemiz, til – kóshpendi qazaq halqynyń eń asyl qazynasynyń biri. Tarıhymyz da, tamyrymyz da tilmen tyǵyz baılanysty. Sondyqtan ana tilimizdiń kez kelgen máselesi biz úshin óte mańyzdy. Til – ulttyń jany. Biraq, bizdiń jýrnalıser "til, til, til" dep shýlaıdy, shýlap ta júr. Túsinemiz. Biraq ta, basqa salada, ekonomıka, óndiris, ınvestısıa salasynda kóptegen kásibı mamandarymyz jumys isteıdi. Olardyń til bilmeýi olardyń qateligi emes. Tildi úırenip te júr, tyrysyp ta júr. Biraq, olar kezinde orys mektepterinde oqydy, shetelde de oqyǵan shyǵar. Sondyqtan qazaq tilin onsha jaqsy bilmeıdi. Biraq ta, bul salanyń bárinde jumys isteý qajet qoı? Qajet. Olar – kásibı mamandar. Sondyqtan meniń oıym, bul másele ret-retimen sheshiledi. Aǵaıyn, ár máseleni baıyppen, aqylmen sheshken jón, – dedi mınıstr.

Osy oraıda ol 1991 jyly qazaq mektepterinde 1 mln bala oqysa, qazirgi ýaqytta 2 mıllıonnan astam bala oqyp júrgenin mysalǵa keltirdi.

– Iaǵnı, qazaq synybyn bitirgen balalardyń sany 2 ese artty. Qazaq mektebinde oqyp júrgen osy oqýshylar memlekettik organdarǵa jáne basqa da salalarda ana tilimizdiń qoldaný aıasyn keńeıtetini sózsiz. Biraq, oǵan ýaqyt kerek, – dedi Dáýren Abaev.

Esterińizge sala ketsek, taıaýda BAQ ókilderi qazaq tili máselesin qaıta kóterip, Prezıdentke hat jazýǵa nıet etken bolatyn.

Marlan Jıembaı

QazAqparat